جماعت اسلامی کے وزراء آستین کے سانپ ہیں ، سراج الحق نے پانچ سال اقتدار کے مزے لئے اور اب ۔۔۔! تحریک انصاف نے سنگین الزامات عائد کردیئے اسلام آباد (این این آئی)پاکستان تحریک انصاف کے مرکزی ڈپٹی سیکریٹری اطلاعات و رکن خیبر پختونخوا اسمبلی شوکت یوسفزئی نے کہا ہے

کہ ان کے اتحادی جماعت اسلامی کے وزراء آستین کے سانپ ہیں اور وہی پشاور کی ترقی میں بڑی رکاوٹ رہے ہیں۔میڈیا رپورٹ کے مطابق شوکت یوسف زئی کا کہنا تھا کہ امیر جماعت اسلامی سراج الحق کے بیان پر افسوس ہوا، وہ سادہ نہ بنیں، 5 سال اقتدار کے مزے لیے ہیں تو ذمہ داری بھی لیں۔انہوں نے کہا کہ بی آر ٹی پشاور کی ترقی کا منصوبہ ہے، پی ٹی آئی اس کی ذمہ داری لیتی ہے۔انہوں نے کہاکہ یہ منصوبہ ایشیائی ترقیاتی بینک کی نگرانی میں بن رہا ہے اور یہ شفاف منصوبہ ہے ٗ کیڑے نکالنے کی کوشش نہ کریں۔انہوں نے کہاکہ 5 سال جماعت اسلامی نے بھی اقتدار کے مزے لوٹے ہیں ٗاگر کوئی خرابی تھی تو امیر جماعت اسلامی کیوں خاموش تھے؟۔شوکت یوسفزئی نے کہا کہ جاتے جاتے ملبہ دوسروں پر ڈالنے کی عادت جماعت اسلامی سے نہیں گئی ہے۔انہوں نے کہا کہ پشاور کی ترقی میں بڑی رکاوٹ جماعت اسلامی کے وزیر رہے جو آستین کے سانپ نکلے ہیں ٗ آئندہ جماعت اسلامی کو کبھی حکومت میں شامل نہیں کریں گے۔یاد رہے کہ جماعت اسلامی خیبر پختونخوا میں پاکستان تحریک انصاف کی اتحادی جماعت ہے۔