اسلام آباد (نیوز ڈیسک) سینئر صحافی و کالم نگار ہارون الرشید نے اپنے کالم میں لکھا کہ چاروں طرف سے زعفران کے کھیتوں میں گھرے شوپیاں شہر میں کشمیری نوجوانوں کے قتلِ عام سے، ایک بار پھر آشکار ہوا کہ بھارت ہار گیا ہے۔ وہ گردنیں تو کاٹ سکتا ہے کہ فوج اس کی بڑی ہے

اور امریکہ سمیت سارا مغرب پشت پناہ لیکن کشمیریوں کے دل اب وہ کبھی نہ جیت سکے گا۔بھارتی اب ان کے لیے اجنبی ہیں۔ اب اس کی کوئی سیاسی اور سفارتی کوشش کامیاب نہیں ہو سکتی۔ کشمیر کی گلیوں میں سونے کے ڈھیر بھی وہ لگا دے تو وہ اسے قبول نہ کریں گے۔ خوف دلوں سے نکل گیا ہے اور جب خوف ختم ہو جائے تو استعمار کے فنا ہونے کا وقت قریب آ جاتا ہے۔ کشمیر کی آزادی کا روزِ سعید کس طرح طلوع ہو گا۔ فی الحال یہ کہنا مشکل ہے۔ یہ مگر یاد رہے کہ انسانی تقدیروں کے فیصلے زمین نہیں، آسمان پر ہوتے ہیں۔حیران کن بات یہ ہے کہ پاکستان میں کشمیریوں کی مدد کرنے والا اب کوئی نہیں۔ کوئی بھرپور عالمگیر سفارتی مہم تو کجا، کسی نے کل جماعتی کانفرنس کا خیال تک پیش نہ کیا، جہاں ایک قرار داد پیش کی جاتی۔ ایک حیران کن بات یہ ہے کہ ملک کی سب سے بڑی سیاسی پارٹی نون لیگ کے سربراہ کشمیریوں کے قتلِ عام پر ایک بیان تک جاری کرنے کے روادار نہیں۔ اب پرویز رشید ان کے سب سے اہم اتالیق ہیں اور پرویز رشید وہ ہیں، جنہوں نے اپنی پچاس سالہ سیاسی زندگی میں قائدِ اعظم اور تحریکِ پاکستان کے حق میں کبھی ایک جملہ بھی ارشاد نہ کیا۔ اللہ کے آخری رسولؐ کا فرمان یہ ہے کہ بسر کرنے کے دو طریقے ہیں: آدمی زندگی پر سوار ہو جائے ورنہ زندگی آدمی پر سوار ہو جاتی ہے۔