لاہور (آن لائن) لاہور ہائیکورٹ نے رحیم یار خان کے چھوٹو گینگ کے خلاف ڈی جی خان میں جاری جیل ٹرائل سکیورٹی خدشات کے پیش نظر ملتان جیل منتقل کرنے کا حکم دے دیا۔ لاہور ہائیکورٹ کے چیف جسٹس یاور علی نے ٹرانسفرکس کی سماعت کی، ڈپٹی پراسیکیوٹر جنرل پنجاب خرم خان نے عدالت کو آگاہ کیا کہ چھوٹو گینگ کے خلاف رحیم یار خان میں دہشت گردی، بھتہ خوری، اغواء برائے تاوان سمیت مختلف الزامات کے تحت نو مقدمات
درج ہیں، انہوں نے بتایا کہ چھوٹو گینگ کو گرفتاری کے بعد رحیم یار خان سے ڈی جی خان منتقل کیا گیا، انہوں نے بتایا کہ ڈی جی خان میں چھوٹو گینگ کا جیل ٹرائل جاری ہے انسداد دہشت گردی عدالت ملتان کے جج کو ہر پیشی پر ڈی جی خان جانا پڑتا ہے جس سے جج، گواہوں اور ملزمان کی سکیورٹی کے خدشات ہیں، انہوں نے استدعا کی سکیورٹی خدشات کے پیش نظر چھوٹو گینگ کے ٹرائل کو ملتان منتقل کیا جائے۔جس پر عدالت نے مقدمہ منتقل کرنے کی درخواست منظور کر لی۔
