کراچی(این این آئی) پاک بحریہ کے جہازپی این ایس شمشیرنے کھلے سمندر میں ایرانی ماہی گیر کشتی کے عملے کو طبی امداد فراہم کی ۔کھلے سمندر میں میری ٹائم آپریشنز کی انجام دہی کے دورا ن پی این ایس شمشیر نے ایرانی ماہی گیرکشتی بُرواری کی ایمر جنسی کال پر فوری امداد فراہم کی۔ ایرانی کشتی جس پر عملے کے 17افراد سوار تھے، کے ماسٹر نے کشتی پر موجود بیمار عملے کی مددکی درخواست کی جن کے دونوں پاؤں جل چکے تھے۔
پی این ایس شمشیر کی میڈیکل ٹیم نے کشتی کے عملے کو ضروری طبی امداد کے ساتھ ساتھ ادویات، مرہم پٹی اور پینے کا صاف پانی بھی فراہم کیا۔ مستقبل میں کسی بھی طبی ایمرجنسی سے نمٹنے کے لئے پی این ایس شمشیر کی میڈیکل ٹیم نے کشتی کے ماسٹر کے سامنے طبی امداد کے طریقہ کار کی عملی مشق بھی کی ۔ایرانی ماہی گیر کشتی کے عملے نے امدادی آپریشن پر پاک بحریہ کا شکریہ ادا کیا۔
