کامونکے(مانیٹرنگ ڈیسک) اللہ نہ کرے ایسا برا وقت آئے کہ مسلم لیگ(ن) کو چھوڑ کر کسی دوسری پارٹی میں جانا پڑ جائے،مختلف معاملات پر ناراضگی ضرور ہے جس سے پارٹی بھی آگاہ ہے مگر پارٹی چھوڑنے کا تصور بھی نہیں کرسکتا۔ان خیالات کا اظہار ایم این اے
پاکستان مسلم لیگ(ن) حلقہ این اے 99رانا عمر نذیر احمد خاں نے اپنے بارے میں پی ٹی آئی میں جانے کی افواہوں کی تردید کرتے ہوئے کیا۔انہوں نے کہاکہ ایسی باتوں میں کوئی صداقت نہیں ہے کہ وہ ن لیگ کو چھوڑ کر تحریک انصاف میں جارہے ہیں بلکہ وہ بدستور مسلم لیگ(ن) میں ہیں اور رہیں گے۔انہوں نے کہاکہ ضلع کونسل کے انتخاب اور دیگر معاملات میں اگر چہ ناراضگی ہوئی جس سے مسلم لیگ(ن) کی قیادت بھی آگاہ ہے مگر اس کے باوجود وہ کسی دوسری پارٹی میں جانے کے بارے میں سوچ بھی نہیں سکتے بلکہ وہ دعا کرتے ہیں کہ اللہ ایسا برا وقت کبھی نہ آئے۔انہوں نے کہاکہ گزشتہ روز وزیراعلیٰ پنجاب کی صدارت میں ہونیوالے اجلاس میں گوجرانوالہ سٹیڈیم میں ہونیوالے جلسہ کے حوالے سیے لائحہ عمل تیار کیا گیا جس میں انہوں نے اپنی طرف سے جلسہ کے انتظامات کے حوالے سے دس لاکھ روپے بھی دیئے۔انہوں نے کہا کہ 9مارچ کو گوجرانوالہ میں ہونیوالا جلسہ ایک نئی تاریخ رقم کرے گا جس میں حلقہ این اے 99سے بھی ہزاروں کی تعداد میں کارکنان شرکت کریں گے اور اس مقصد کیلئے عوامی رابطہ مہم شروع کردی گئی ہے۔
