کراچی(آئی این پی) نیو سندھ سیکریٹریٹ بلڈنگ کی عمارت میں آتشزدگی کے نتیجے میں کئی محکموں کا ریکارڈ جل گیا،تفصیلات کے مطابق ہفتے کی شام نیوسندھ سیکریٹریٹ کی عمارت میں اچانک آگ بھڑک اٹھی جسے بجھانے کے لیے فائر بریگیڈ کی 4 گاڑیاں موقع پر پہنچ گئیں اور دو گھنٹے کی جدوجہد کے بعد آگ پر قابو پالیا جس کے بعد کولنگ کا عمل جاری رہا،واضح رہے کہ عمارت کے جس حصے میں آگ لگی وہاں وزیر اعلیٰ سندھ سمیت دیگروزراء اور محکموں کے دفاتر ہیں جن میں صحت،
ایس این جی ڈی، خوراک، تعلیم کے محکمے شامل ہیں۔آتشزدگی کے بعد مختلف محکموں کا ریکارڈ جل گیا، جبکہ دفاتر میں موجود فرنیچر بھی جل کر خاکستر ہوگیا،آگ لگنے کی فوری طور پر وجوہات معلوم نہیں ہوسکیں جبکہ اطلاع ملنے پر متعلقہ محکموں کے افسران بھی پہنچ گئے تھے،انہوں نے آگ بجھانے والے عمل کی نگرانی کی ،آگ لگنے کے سب سندھ سیکریٹریٹ سے ملحقہ سڑکوں پر ٹریفک جام بھی رہا اور لوگوں نے اپنی گاڑیاں روک کر آگ کی جگہ کا معائنہ کیا اور لوگوں سے معلومات بھی کیں۔
