لاہور( این این آئی)مسلم لیگ (ن) کی مرکزی رہنما مریم نوازنے کہاہے کہ اگر طاہر القادری ، عمران خان اور دیگر اکٹھے نہیںہوں گے تو عوام کو کیسے پتہ چلے گا کہ سازش میں کون کون ملوث ہے ، یہ پہلے بھی ناکام ہوئے اور اب بھی نتیجہ مختلف نہیں ہوگا ، مسلم لیگ (ن) کی حکومت نے عوام کی خدمت کی ہے اور آئندہ بھی اس پر کاربند رہیں گے ۔ ان خیالات کااظہارانہوں نے حلقہ این اے 120کے دورہ کے موقع پر

میڈیا سے گفتگو کرتے ہوئے کیا ۔ مریم نواز نے حلقے کا دورہ کر کے عوام سے انکے مسائل بارے آگاہی حاصل کی اور انہیں جلد سے جلد حل کرنے کی یقین دہانی بھی کرائی ۔ اس موقع پر لوگوں کی جانب سے گیس کی عدم دستیابی کی بھی شکایات کی گئیں ۔ مریم نواز نے گفتگو کرتے ہوئے کہا کہ یہ وہ حلقہ ہے جس نے ہمیشہ مسلم لیگ (ن) کو کامیابی دی ، عوام کے مسائل کو ہر صورت حل کیا جائے گا اورحکومت ہرگزغافل نہیں ۔

انہوں نے طاہر القادری ، عمران خان اور آصف علی زرداری کے اکٹھے ہونے بارے سوال کے جواب میں کہا کہ اگر یہ اکٹھے نہیں ہوں گے تو عوام کو کیسے پتہ چلے گا کہ کیسے سازش ہوئی اور کون کون شریک تھا ۔ لیکن یہ پہلے بھی ناکام ہوئے اور اب بھی ناکام ہوں گے ۔ انہوںنے کہا کہ آئندہ عام انتخابات میںبھی عوام ملک اورقوم کی ترقی اور خوشحالی کی ضامن مسلم لیگ (ن) کوکامیاب کرائیں گے۔