قصور (مانیٹرنگ ڈیسک )قصور میں جنسی زیادتی کے بعد سفاکی سے قتل کی جانے والی ننھی پری زینب کی پوسٹ مارٹم رپورٹ میں اہم انکشاف ہوا ہے ۔ تفصیلات کے مطابق زینب کی پوسٹ مارٹم رپورٹ میں زیادتی کے واضح شواہد ملے ہیں تاہم مزید تحقیقات کیلئے نمونے کو فرانزک رپورٹ لیبارٹری بھجوایا گیا ہے ۔ پوسٹ مارٹم رپورٹ کے مطابق زینب کے دونوں بازوئوں کی کلائیوں کو کاٹا گیا، ناک اور گلے کے قریب تشدد کا نشان اور

موت گلا دبانے پر ہوئی ۔ ترجمان پنجاب حکومت کا کہنا تھا کہ تمام ثبوت اور شواہد سے یہی معلوم ہوتا ہے کہ تمام واقعات میں ایک شخص ملوث ہے۔ دریں اثنا نجی ٹی وی پروگرام میں گفتگو کرتے ہوئے پاکستان کے معروف و سینئر صحافی ڈاکٹر شاہد مسعود نے انکشاف کیا ہے کہ قصور کی ننھی زینب کا قاتل پکڑا گیا ہے اور اس نے اعتراف جرم بھی کر لیا ہے۔ شاہد مسعود نے مزید انکشاف کرتے ہوئے کہا کہ قاتل کی گرفتاری آئی ایس آئی اور ایم آئی کی مشترکہ کوششوں کا نتیجہ ہے ۔ زینب کا قاتل مبینہ طور پر بچی کا رشتہ دار یا قریبی عزیز ہے ۔ ان کا کہنا تھا کہ جب زینب کے قتل کا معاملہ ابھر کر سامنے آیا تو قاتل کو اندازہ ہوگیا تھا کہ وہ اب بچ نہیں سکتا ، اس نے فرار ہونے کیلئے اپنے دوست سے بھی مدد طلب کی تھی۔ ڈاکٹر شاہد مسعود نے بتایا کہ قاتل کے ڈی این اے اور دیگر ضروری کارروائی کا عمل جاری ہے۔

موضوعات:قصور ننھی پری زینب