اسلام آباد(مانیٹرنگ ڈیسک)نواز شریف اپنی بیٹی مریم نواز کے ہمراہ لندن سے وطن واپس پہنچ گئے ہیں، وہ ہیتھرو ائیرپورٹ سے پی آئی اے کی پروازپی کے 758 سے لاہورپہنچے۔ برطانیہ میں پاکستان کے ہائی کمشنرسید ابن عباس کی جانب سے پاکستان کے سابق وزیراعظم کو خصوصی پروٹوکول دیا گیا، وہ جہازکے اندرتک چھوڑنے کے لیے آئے جب کہ ائیرپورٹ جانے کے لئے پاکستان ہائی کمیشن کی گاڑی بھی نوازشریف کی رہائش گاہ پربھیجی

گئی۔ ذرائع کے مطابق لندن میں مقیم پاکستانی تارکین وطن کا کہنا تھا کہ ایک نااہل وزیراعظم کو پاکستانی سفارتخانے کا پروٹوکول بیرون ملک پاکستان کی سبکی کا باعث ہے۔ یہاں کے لوگ یہ دیکھ کر ہنستے ہیں کہ جس وزیراعظم کو ملک کی اعلیٰ عدلیہ نے نا اہل قرار دیا ہے اس کو ابھی تک عدالتی فیصلے کے باوجود وہی پرانا پروٹوکول مل رہا ہے جس سے نہ صرف ہمارے نظام بلکہ ہماری عدلیہ کا بھی مذاق پوری دنیا میں اڑ رہا ہے۔