کراچی/لاہور( این این آئی)پاکستان انٹر نیشنل ائیر لائنز کے عملے کی لاپرواہی کا ایک اور واقعہ سامنے آیا ہے ،پی آئی اے دو پاکستانیوں کی میتیں ہی امریکہ میں بھول آئی۔ترجمان پی آئی اے مشہود تاجور نے واقعے پر معافی مانگتے ہوئے کہا کہ پاکستان ایئرلائن غمزدہ خاندانوں کے دکھ میں شریک اور معذرت خواہ ہے۔ دونوں میتیں نیویارک میں قومی ایئرلائین کو گرائونڈ ہینڈلنگ سروس دینے والی ایجنسی کی لاپرواہی کی
وجہ سے امریکہ ہی میں رہ گئی جس پر ایجنسی کے خلاف قانونی کارروائی کی جائے گی۔ترجمان کا کہنا ہے کہ پی آئی اے کے سی ای او مشرف رسول نے نیویارک میں دو پاکستانیوں کی میتیں رہ جانے کے واقعے کا نوٹس لے لیا ہے اورمیتوں کی آخری رسومات تک تمام انتظامات ادارے کو کرنے کے احکامات جاری کئے ہیں۔ترجمان پی آئی اے مشہودتاجورنے بتایا ہے کہ مرحوم ناصرعلی کی میت اتحاد ایئرلائین کے ذریعے یکم نومبر کو لاہور پہنچائی جائے گی جبکہ مرحوم نعمان بدر کی میت ان کے اہل خانہ کی ہدایات پر امریکہ کے قبرستان میری لینڈ میں دفنائی جائے گی۔نجی ٹی وی دنیا نیوز کے مطابق پرواز میں فالتو سامان کو لانے کی خاطر میتیں پاکستان نہیں لائی گئیں۔
