کراچی(این این آئی)سندھ کے محکمہ اطلاعات میں پانچ ارب چھیتر کروڑ روپے کی کرپشن کا الزام، سابق وزیر اطلاعات ساتھیوں سمیت جیل بھیج دیئے گئے۔ سندھ سرکار کی مہربانی سے شرجیل میمن کو جیل میں بھی پروٹوکول مل گیا۔ رکن سندھ اسمبلی کی خدمت کیلئے آٹھ قیدیوں کی ڈیوٹی لگا دی گئی۔ شرجیل میمن کو وی وی آئی پی وارڈ میں اس جگہ رکھا گیا ہے جہاں سابق صدر آصف زراری نے قید کاٹی تھی۔
سابق وزیر کو ٹی وی، فرج اور ایئرکنڈیشنڈ کی سہولت کے ساتھ ساتھ لیپ ٹاپ بھی مل گیا۔ شرجیل میمن کا حوصلہ بڑھانے پہلے روز وزیر اعلی سندھ اور پانچ وزرا بھی جیل پہنچ گئے۔ وزرا کے ساتھ تین گھنٹے کی ملاقات میں گپ شپ بھی ہوئی اور تاش بھی کھیلتے رہے۔ ذرائع کے مطابق شرجیل میمن کیلئے کھانا گھر سے منگوایا گیا۔ ڈنر میں مٹن کٹراہی، قیمہ، مکس سبزی، دال اور مچھلی شامل تھی۔
