اسلام آباد (مانیٹرنگ ڈیسک) نامور وکیل اور پیپلز پارٹی کے سینئر رہنما اعتزاز احسن نے کہا ہے کہ الیکشن اصلاحات بل پرووٹنگ کی صورت میں کئی نئی چیزیں سامنے آ سکتی ہیں۔ انہوں نے انکشاف کیا کہ پاکستان تحریک انصاف کے ایک رکن جب ووٹنگ ہو رہی تھی تو وہاں سے چلے گئے جبکہ ایم کیو ایم کے میاں عتیق نے حکمران جماعت کو ووٹ دیا۔ نواز شریف کی جماعت کی ایوان زیریں اور ایوان بالا میں اکثریت ہے۔
انہوں نے کہا کہ یہ انتہائی شرمناک بات ہے کہ سینٹ میں ہارس ٹریڈنگ ہوئی۔ انہوں نے حلقہ این اے 120 میں پیپلز پارٹی کی شکست کی ذمہ داری پارٹی کے سابق وزیراعظم گیلانی اور دیگر رہنماؤں پر ڈالی۔ انہوں نے کہا کہ کس قدر افسوس کا مقام ہے کہ پی پی کے امیدوار نے 1414 ووٹ حاصل کئے۔ نجی نیوز چینل سے بات چیت کرتے ہوئے حکمران جماعت کے اراکین ایوان بالا میں مک مکا کرتے رہے اس موقع پر سعد رفیق نے اہم کردار ادا کیا۔ انہوں نے کہا کہ عدالت کا رویہ نواز شریف کے ساتھ کافی لچکدار ہے۔ انہوں نے کہا کہ نوازشریف جان بوجھ کر تاخیر کر رہے ہیں تاکہ انہیں معمولی وقت کیلئے گرفتار کیا جائے۔ انہوں نے کہا کہ سابق وزیراعظم نواز شریف کی مرضی سے سعد رفیق کو بھی گرفتار کیا جا سکتا ہے مگر اس تمام تر صورتحال کے باوجود شریف فیملی سانحہ ماڈل ٹاؤن سے جان نہیں چھڑا سکتی۔ انہوں نے کہا کہ حکمران جماعت جان بوجھ کر ایسے حالات پیدا کر رہی ہے کہ ادارے آمنے سامنے آ جائیں جو ملک کیلئے کسی بھی صورت فائدہ مند نہیں۔ انہوں نے کہا ہے کہ الیکشن اصلاحات بل پرووٹنگ کی صورت میں کئی نئی چیزیں سامنے آ سکتی ہیں
