اسلام آباد (این این آئی)محکمہ موسمیات نے کہا ہے کہ رواں ہفتے اسلام آباد ٗبالائی پنجاب ،خیبر پختونخوا ، زیریں سندھ اور ملک کے اکثر مقامات پر تیز ہواؤں اور گرج چمک کے ساتھ بارش کا امکان ہے ۔ محکمہ موسمیات کے مطابق بدھ اور جمعرات کو اسلام آباد و راولپنڈی، بہاولپور، ملتان، ڈی جی خان اور ساہیوال ڈویژن میں کہیں کہیں جبکہ ہزارہ، گلگت بلتستان اور کشمیر میں چند مقامات پر تیز ہواؤں اور گرج چمک کے ساتھ بارش کا امکان ہے ۔

گزشتہ 24 گھنٹوں کے دوران ملک کے بیشتر علاقوں میں موسم گرم اور مرطوب رہا ہے تاہم اسلام آباد ، راولپنڈی، سرگودھا ڈویژن اور اسلام آباد میں چند مقامات پر تیزہواؤں اور گرج چمک کے ساتھ بارش ہوئی ۔ سب سے زیادہ بارش سرگودھا میں 27 ملی میٹر ریکارڈ کی گئی۔ آئندہ 24 گھنٹوں کے دوران اسلام آباد سمیت بالائی پنجاب ،خیبر پختونخوا ، زیریں سندھ ، میرپورخاص، حیدرآباد، کراچی ڈویژن اور ملک کے اکثر مقامات پر تیز ہواؤں اور گرج چمک کے ساتھ بارش جبکہ ملک کے دیگر علاقوں میں موسم بدستور خشک رہے گا۔