اسلام آباد (مانیٹرنگ ڈیسک) تحریک انصاف کی رہنما نے صحافی کو قتل کروانے کا اعتراف کر لیا، تفصیلات کے مطابق گزشتہ ماہ ہری پور میں قتل ہونے والے صحافی بخشیش علی کے قتل کیس میں ملوث تحریک انصاف کی کونسلر حنا اختر اور حنیف اختر کو گرفتاری کے بعد جوڈیشل مجسٹریٹ کے سامنے پیش کردیا گیا، جوڈیشل مجسٹریٹ نے ابتدائی سماعت کے بعد کیس اینٹی ٹیررازم کورٹ کو بھجوا دیا ہے،
دونوں ملزمان کو تین دن کے لیے اینٹی ٹیررازم ڈیپارٹمنٹ کے حوالے کر دیا گیا ہے۔ انگریزی روزنامے ایکسپریس ٹریبیون کے مطابق پولیس کی تفتیش کے دوران پتہ چلا ہے کہ پاکستان تحریک انصاف کی خاتون کونسلر حنا اختر کے صحافی بخشیش الہی کے ساتھ ذاتی اختلافات تھے اس وجہ سے خاتون کونسلر نے حنیف اختر کے ساتھ مل کر بخشیش الہی کے قتل کا منصوبہ بنایا، واضح رہے کہ حنیف اختر ایک اردو روزنامہ کے بیورو چیف ہیں۔ اس قتل کے لیے خاتون کونسلر حنا اختر نے حنیف اختر کو 5 لاکھ دینے کی آفر پر قتل کے لیے آمادہ کیا۔ اس ڈیل کے تحت حنا اختر نے قاتل حنیف اختر کو ایک لاکھ روپے قتل کرنے سے پہلے دیے اور باقی کے چار لاکھ روپے قتل کے بعد دیے جانے تھے۔ گزشتہ ماہ صحافی بخشیش الہیٰ کو دفتر جاتے ہوئے موٹر سائیکل سواروں نے قتل کر دیا تھا جب پولیس نے مقتول کے بھائی کی مدعیت میں مقدمہ درج کرکے تحقیقات کا آغاز کیا تو انہیں معلوم ہوا کہ پاکستان تحریک انصاف کی خاتون کونسلر اور مقامی اخبار کا بیورو چیف حنیف اختر اس قتل میں ملوث ہے جس پر انہیں گرفتار کر لیا گیا، گرفتاری کے بعد ان دونوں نے قتل کا اعتراف کر لیا۔
