اسلام آباد(مانیٹرنگ ڈیسک)مسلم لیگ ن کی پارلیمانی پارٹی کا اجلاس طلب، وزیراعظم نواز شریف صدارت کریں گے، ملکی سیاسی صورتحال پر ممبران اسمبلی اور سینٹ کو اعتماد میں لیں گے۔ تفصیلات کے مطابق مسلم لیگ ن کی پارلیمانی پارٹی کا اجلاس آج وزیراعظم نواز شریف کی صدارت طلب کر لیا گیا ہے جس میں وزیراعظم پانامہ کیس اور اس کے بعد پیدا ہونیوالی صورتحال پر ممبران اسمبلی اور
سینٹ کو اعتماد میں لیں گے۔ ذرائع کے مطابق ن لیگ پارلیمانی پارٹی اجلاس بلانے کا مقصد ناراض اراکین کو منانا اور اعتماد میں لینا ہےکیونکہ گزشتہ چند روز سے اطلاعات آرہی تھیں کہ متعدد اراکین اسمبلی نے دوسری جماعتوں کے ساتھ رابطے کر لئے ہیں اور جلد ہی وہ ن لیگ چھوڑ کر دوسری جماعتوں میں چلے جائیں گے۔ اس اہم موقع پر ن لیگ پارلیمانی پارٹی کا اجلاس نہایت اہمیت اختیار کر چکا ہے۔
