اسلام آباد (مانیٹرنگ ڈیسک) معروف موبائل کمپنی کا پاکستانیوں کے ساتھ بڑا دھوکہ، ایف آئی اے حرکت میں آ گئی، تفصیلات کے مطابق وزارت انفارمیشن و ٹیکنالوجی نے کیو موبائل کی جانب سے ای ایم ای آئی نمبر کے بغیر موبائل فونز فروخت کرنے کے معاملے کی ایف آئی اے سے انکوائری کرانے کا فیصلہ کیا ہے واضح رہے کہ ان موبائل فونز کی مالیت کروڑوں میں ہے جو مارکیٹ میں فروخت ہو رہے ہیں۔
پی ٹی اے کے حکام سے اس بارے میں وضاحت طلب کی ہے کہ کیو موبائل نے ان کی منظوری کے بغیر کروڑوں روپے مالیت کے موبائل فونز کیسے مارکیٹ میں فروخت کئے۔ وزارت آئی ٹی کے ڈائریکٹر پی آر صغیر انور وٹو نے کہا کہ کوئی بھی موبائل کمپنی اپنے فونز بغیر ای ایم ای آئی نمبر کے مارکیٹ میں فروخت نہیں کر سکتی، اس معاملے کا تعلق براہ راست ٹیلی کام اتھارٹی سے ہے۔ وزیر مملکت آئی ٹی و ٹیلی کام انوشہ رحمان نے کیو موبائل کی طرف سے کروڑوں روپے کے موبائل فونز بغیر ای ایم ای آئی نمبر کے فروخت کرنے کے معاملہ کے بارے میں پی ٹی اے سے بھی وضاحت طلب کر لی ہے۔ اس معاملے پر پی ٹی اے کے متعلقہ سینئر افسر محمد طالب ڈوگر سے بھی وضاحت طلب کی گئی ہے۔ وزارت کے حکام کا کہنا ہے کہ پی ٹی اے کی طرف سے اگر اس معاملہ پر تسلی بخش جواب نہ ملا تو معاملہ کی انکوائری ایف آئی اے سے کرائی جائے گی اور جو کوئی بھی اس معاملے میں ملوث پایا گیا اس کے خلاف قانونی کارروائی کی جائے گی۔
