اسلام آباد (این این آئی)پاکستان الیکٹرانک میڈیا ریگولیٹری اتھارٹی (پیمرا) نے ناشائستہ و قابلِ اعتراض مواد پر مشتمل ’اِگلو ‘پروڈکٹ کے اشتہار کی نشریات پر پابندی عائد کر دی ہے ۔ معمول کی مانیٹرنگ کے دوران اتھارٹی کے نوٹس میں آیا ہے کہ نجی ٹی وی چینلز پر ’اِگلو ‘ پروڈکٹ کا اشتہار دکھایا جارہا ہے جس میں نشر کیا جانے والا مواد ناشائستہ ،قابلِ اعتراض ،اخلاقیات کے عمومی قابلِ قبول معیارات کے بر عکس اور پیمرا

قوانین کی بیشتر شقوں کی صریحاً خلاف ورزی ہے لہٰذا پیمرا آرڈیننس 2002(ترمیمی ایکٹ 2007)کی دفعہ 27(a)کے تحت مذکورہ اشتہار کی نشریات پرمورخہ 8جولائی 2017ء شام 4بجے سے مکمل پابندی عائد کر دی گئی ہے ۔خلاف ورزی کرنے والے ٹی وی چینلوں اور کیبل آپریٹرز کیخلاف پیمرا آرڈیننس 2002(ترمیمی ایکٹ 2007)کی سیکشن 29اور 30کے تحت کارروائی کی جائیگی۔

موضوعات:پیمرا