لاہور ( آن لائن) برہان وانی کا یوم شہادت قریب آنے پر ٹویٹر انتظامیہ نے کشمیریوں کے حق میں مہم چلانے والے سینکڑوں اکاؤنٹس ڈیلیٹ کر دیے ہیں۔ بھارتی دباؤ پر ختم کئے گئے اکاؤنٹس میں جماعۃالدعوۃ کے سربراہ پروفیسر حافظ محمد سعید،حافظ عبدالرحمن مکی اور انوائیٹ میگزین سمیت دیگر کشمیری جماعتوں کے اکاؤنٹس بھی شامل ہیں۔فلاح انسانیت فاؤنڈیشن کے کئی اکاؤنٹس بھی معطل کئے گئے ہیں۔ برہان وانی کے یوم شہادت کے
حوالہ سے جماعۃالدعوۃ پاکستان نے سات سے انیس جولائی تک عشرہ شہدائے کشمیر منانے کا اعلان کیا ہے اور اس سلسلہ میں ملک گیر سطح پر بڑے پیمانے پر مہم چلائی جارہی ہے۔ جماعۃالدعوۃ کے مرکزی و ضلعی اکاؤنٹس سمیت مختلف رہنماؤں کی جانب سے سات جولائی کو یوم شہدائے کشمیر منانے اور لاہور، اسلام آباد، راولا کوٹ و دیگر شہروں میں ہونے والے پروگراموں کی بھرپور تشہیر کی جارہی تھی کہ بھارتی دباؤ پر ٹویٹر انتظامیہ نے جماعۃالدعوۃ کی سوشل میڈیا پر جاری سرگرمیوں کیخلاف گرینڈ آپریشن کرتے ہوئے حافظ محمد سعید اور حافظ عبدالرحمن مکی سمیت دیگر مختلف رہنماؤں کے اکاؤنٹس ڈیلیٹ کر دیے ہیں۔ انگریزی میگزین انوائیٹ اور فلاح انسانیت فاؤنڈیشن کے کئی اکاؤنٹس بھی معطل کر دیے گئے ہیں۔ جماعۃالدعوۃ پاکستان کے ترجمان یحییٰ مجاہد نے برہان وانی سمیت دیگر کشمیری شہداء کے حق میں اور بھارتی مظالم کیخلاف مہم چلانے پر ٹویٹر انتظامیہ کی طرف سے اکاؤنٹس ڈیلیٹ کرنے پر ردعمل ظاہرکرتے ہوئے کہا ہے کہ بھارتی دباؤ پر ٹویٹر انتظامیہ کا کشمیریوں کے حق میں سرگرمیاں جاری رکھنے والے اکاؤنٹس ڈیلیٹ کرنا انتہائی افسوسناک ہے۔چاہیے تو یہ تھا کہ ٹویٹر انتظامیہ بھی نہتے کشمیریوں کی قتل و غارت گری اور کیمیائی ہتھیار استعمال کرنے والی بھارتی فوج اور بی جے پی حکومت کیخلاف آواز بلند کرے لیکن ایسا کرنے کی بجائے مظلوم کشمیریوں کے حق میں آواز بلند کرنے والے اکاؤنٹس ہی ختم کر دیے گئے ہیں۔ انہوں نے کہاکہ جماعۃالدعوۃ ایسی مذموم حرکتوں سے پریشان ہونے والی نہیں ہے۔ نئے اکاؤنٹس بنا کر مظلوم کشمیریوں کی مددوحمایت کا سلسلہ جاری رکھا جائے گا۔ترجمان نے کہاکہ فیس بک اور ٹویٹر انتظامیہ کی طرف سے پہلے بھی ایسی حرکتیں کی جاتی رہی ہیں جسے کسی صورت درست قرار نہیں دیا جاسکتا۔
