اسلام آباد(آئی این پی ) رمضان المبارک کے دوران عمرہ کی خواہش رکھنے والے پاکستانی مسائل سے دوچار،ویزوں کا بحران جاری، اسلام آباد میں سعودی سفارتخانے میں60ہزار سے زائد پاسپورٹ اسٹمپنگ کے منتظر، نان ریفنڈ ایبل ہوائی ٹکٹوں اور ہوٹلوں کی بکنگ کی مد میں عمرہ کمپنیوں کو کروڑوں روپے کا ٹیکہ لگنے کا خدشہ،ٹور آپریٹرز اور زائرین کے درمیان ،تلخ کلامی اور لڑائی جھگڑے معمول بن گئے ،

حکام خاموش تماشائی کا کردار ادا کرنے لگے۔تفصیلات کے مطابق اسلام آباد میں سعودی سفارتخانہ رمضان کے دوران عمرہ کی سعادت حاصل کرنے کے خواہش مند پاکستانیوں کو بروقت ویزوں کے اجرا میں بدستور ناکام ہے اور وقت گزرنے کے ساتھ ساتھ ویزوں کے بحران میں شدت آ رہی ہے۔گزشتہ ایک ہفتے کے دوران سے پاکستانی زائرین کو اسلام آباد سے ویزے جاری نہیں کئے جا سکے جس کے باعث سعودی سفارتخانے میں 60ہزار سے زائد پاکستانیوں کے پاسپورٹ ویزوں کے منتظر ہیں ۔ دوسری جانب پاکستانی ٹور آپریٹرز نے نان ریفنڈ ایبل ہوائی ٹکٹوں اور ہوٹلوں کی بکنگ کی مد میں کروڑوں روپے کی پیشگی ادائیگی کر رکھی ہے ،زائرین کو بروقت ویزے نہ ملنے کی وجہ سے یہ رقم ڈوبنے کا خدشہ ہے ۔جہاں عمرہ زائرین ویزے نہ ملنے کے باعث پریشانی کا شکار ہیں وہیں عمرہ کمپنیوں کے کروڑوں روپے دا پر لگے ہیں۔زائرین اور ٹور آپریٹرز کے درمیان تلخ کلامی اور لڑائی جھگڑے معمول بن چکے ہیں ۔عمرہ آ پریٹرز نے حکومت پاکستان سے بارہا مداخلت کی اپیل کی ہے لیکن حکام کے کانوں پر جوں تک نہیں رینگ رہی۔پاکستانی حکام اور سعودی سفارت خانے کے طرز عمل کے باعث ٹریول ایجنسیز کو شدید نقصان کا خدشہ ہے ٹریول آپریٹرز کو اس سے پہلے کروڑوں روپے کا نقصان ہو چکا ہے اور اس میں مسلسل اضافہ ہورہا ہے ۔

اسلام آباد، پنجاب اور کے پی کے سے ٹریول ایجنٹس اور عمرہ زائرین نے ایک بار پھر وزیراعظم میاں محمد نواز شریف ، وزارت خارجہ ، وزارت سیاحت اور وزیر مذہبی امور سے اپیل کی ہے کہ وہ اس سنگین صورتحال کا فوری نوٹس لیں اور اس سلسلے میں سعودی حکام سے رابطہ کرکے اصلاح احوال کیلئے فوری اقدامات کریں