اسلام آباد (مانیٹرنگ ڈیسک)انتہا پسند ہندوئوں نے ایکسچینج پروگرام کے تحت بھارت پہنچنے والے 50پاکستانی بچوں اور اساتذہ کو بھی نہ بخشا، بچے اور اساتذہ سخت سکیورٹی میں پاکستان پہنچا دئیے گئے۔تفصیلات کے مطابق بھارتی این جی او کے پروگرام کے تحت پوری دنیا سے سکولوں کے بچے اور اساتذہ ایک تقریب میں شرکت کیلئے بھارت پہنچے ان بچوں میں 50پاکستانی بچے اور اساتذہ بھی شامل تھے مگر بھارتی حکومت سکیورٹی فراہم کرنے میں ناکام نظر آئی۔
ہندو انتہا پسندوں نے پاکستانی بچوں اور اساتذہ کیساتھ ساتھ میزبان این جی او کے منتظمین کو بھی سنگین دھمکیاں دینا شروع کر دیں جس کے باعث پاکستانی بچوں اور اساتذہ کو سخت سکیورٹی میں امرتسر لایا گیا جہاں سے انہیں واپس پاکستان بھیج دیا گیا ہے۔پاکستانی نجی ٹی وی کے مطابق پاک بھارت حالیہ بڑھتی ہوئی کشیدگی کے باعث پاکستان میں بھارتی ہائی کمیشن کا بھی کہنا ہے کہ لوگ بھارت جانے سے خوفزدہ ہیں اور ویزے کیلئے آنے والی درخواستوں میں کمی واقع ہوئی ہے۔
