اسلام آباد (احمد ارسلان ) آپ کے خیال میں دنیا کی آبادی کتنی ہوگی ؟ ایک محتاط اندازے کے مطابق 7.5بلین لوگ اس وقت نیلی چھتری تلے سانس لے رہے ہیں ۔ زندگی کے کٹھن سفر پر نکلے ان لوگوں کے حالات ایک جیسے نہیں ۔ کوئی مزے میں ہے تو کوئی اس قدر مشکلا ت کا شکار کہ بس دن پورے کیے جا رہا ہے ۔

نہ اس کی زندگی کا کوئی مقصد ہے اور نہ کوئی خواہشات جو اسے آگے بڑھنے میں مدد دیں ۔ ایسے ہی مایوس لوگوں میں امید کے دیے جلانے کیلئے کچھ لوگ، محض کچھ لوگ آگے آتے ہیں جن کی باتوں میں شعلوں کی سی تپش ہوتی ہے ۔ جن کی عادات ایسی ہوتی ہیں کہ جو دیکھے انہیں اپنانا چاہے ۔ ان کے افکار، جس سے لوگوں کی زندگیاں سنور جائیں ۔یہی چندلوگ جنہیں ہم اپنا سب کچھ مانتے ہیں ۔ یہ ہمارےلیڈرز ہیں ۔ عمران خان انہیں چند میں سے ایک ، پاکستان کے ایک بڑے لیڈر ہیں ۔ لوگوں کی ایک بڑی تعداد انہیں اپنا سب کچھ مانتی ہے ۔ ان کے ایک اشارے پر ہزاروں، لاکھوں لوگ جمع ہوجاتے ہیں ۔ یوں تو ایک دنیا کپتان کی مداح ہے مگر پاکستان سے بھارت گئے ایک معروف اداکار دلیپ کمار نے ان کے بارے کیا خوب کہا کہ ’’ کتنی عظیم ہے وہ ماں جس نے عمران خان کو جنم دیا ۔ عمران خان ایک محض ایک گوشت پوست کا آدمی نہیں بلکہ وہ عزم و ہمت اور شجاعت کی ایک چٹان ہے جس کے اس قدر بلند ارادے ہیں ۔ انہوں نے کہا کہ خوش نصیب ہیں پاکستانی عوام اور ان کے عزیز و اقارب جن کے درمیان عمران خان جیسا ایک عظیم انسان موجود ہے جو اپنےآ پ کو بائولنگ اور بیٹنگ کرتے کرتے کہاں سے کہاں لے آیا ہے۔