راولپنڈی(مانیٹرنگ ڈیسک)پاک فوج کے سربراہ جنرل قمرجاوید باجوہ نے سینٹرل کمانڈ ہیڈکواٹرز کھاریاں کا دورہ کیا اور افسران اور جوانوں سے ملاقات کی ۔ایک نجی ٹی وی کے مطابق تقریب میں افسران نے آرمی چیف سے بعض قومی معاملات پرشکوے بھی کئے
نجی ٹی وی کے ذرائع کے مطابق افسران کے آرمی چیف سے ڈان لیکس اور رانا ثناءاللہ سے متعلق سوالات کئے گئے ۔ذرائع کے مطابق آرمی چیف سے فوجی افسر نے سوال کیا کہ ڈان لیکس کی تحقیقات اب تک مکمل نہیں ہوسکیں جبکہ فوجی عدالتوں سے متعلق راناثناءاللہ کےبیان پربھی بات چیت ہوئی۔جنرل قمرجاوید باجوہ سے کھاریاں میں افسران کامختلف امور پرتبادلہ خیال ہوا، اس موقع پر آرمی چیف جنرل قمرجاوید باجوہ نے افسروں اورجوانوں سےخطاب کرتے ہوئے کہا کہ پاک فوج بہترین ادارہ ہے، ادارے کی ساکھ اور عزت برقرار رکھی جائے گی۔جنرل قمرجاوید باجوہ نے کہا کہ ادارے کی عظمت،ساکھ کو محنت،خدمت سےبرقراررکھیں گے۔ اس موقع پرانہوں نے انسداد دہشتگردی میں کردار پرجوانوں کو خراج تحسین بھی پیش کیا ۔
