مظفرگڑھ( نیوزڈیسک) پنجاب کے سابق گورنر اور سابق وزیراعلیٰ پنجاب ملک غلام مصطفی کھر نے کہا ہے کہ قا ئداعظم محمد علی جناح اور ذوالفقار علی بھٹو شہید کے بعد جنرل راحیل شریف نے پاکستان کیلئے یاد گار کردار ادا کیا اور جنرل راحیل شریف نے پاکستان کو تباہ کرنے کی سازشوں کا قلع قمع کرنے میں کلیدی کردار ادا کیا۔ انہوں نے ان خیالات کا اظہار مظفرگڑھ پریس کلب کے صدر اے بی مجاہد سے انکی والدہ محترمہ کی وفات پر تعزیت اور فاتحہ خوانی کے موقع پر میڈیا نمائندوں سے بات چیت کرتے ہوئے کیا۔
انہوں نے کہا کہ وہ قوم و ملک کے درخشاں مستقبل پر یقین رکھتے ہیں اور اپنی بساط کے مطابق سیاست میں کوئی ایسا کردار ادا کرنا چاہتے ہیں جسکی وہ موجودہ وقت میں اشد ضرورت محسوس کرتے ہیں تاہم وہ اپنی الگ جماعت بنانے کی بجائے پی ٹی آئی یا پی پی پی میں شامل ہوسکتے ہیں اور اس سلسلے میں ملک بھر کے اپنے دیرینہ دوستوں سے مشاورت کررہے ہیں۔
