پشاور (آئی این پی) سانحہ اے پی ایس کے شہداء کی دوسری برسی کے موقع پر آرمی چیف جنرل قمر جاوید باجوہ نے یادگار شہدا اے پی ایس پر پھولوں کی چادر چڑھائی۔ تقریب میں گورنر خیبرپختونخوا ‘ کور کمانڈر پشاور اور اعلیٰ سول اور عسکری حکام نے شرکت کی۔ جنرل قمر جاوید باجوہ نے یادگار شہدا اے پی ایس پر پھولوں کی چادر چڑھائی۔ اس موقع پر آرمی پبلک سکول پشاور کے شہدا کے لئے خصوصی دعا کی گئی۔
جبکہ آرمی چیف جنرل قمر جاوید باجوہ نے اے پی ایس کی تقریب سے خطاب کرتے ہوئےکہا ہے کہ جب تک پاکستان کو امن کا گہوارہ نہیں بنائیں گے چین سے نہیں بیٹھیں گے‘ دہشت گردوں کے خلاف ہماری جدوجہد جاری رہے گی‘ اے پی ایس کے شہداء کی قربانی نے قوم کو نیا جذبہ دیا‘ قوم اور عسکری ادارے وزیراعظم محمد نواز شریف کے ساتھ کھڑے ہیں۔ وہ جمعہ کو سانحہ اے پی ایس کی دوسری برسی کے موقع پر تقریب سے خطاب کررہے تھے۔ انہوں نے کہا کہ اے پی ایس پر حملہ ہماری جدوجہد کو نقصان پہنچانے کی کوشش تھی۔ جب تک پاکستان کو امن کا گہوارہ نہیں بنائیں گے چین سے نہیں بیٹھیں گے۔ اے پی ایس کے شہدا نے قربانی سے قوم کو نیا جذبہ دیا۔ شہید ہونے والے بچوں کے والدین کا درد سمجھ سکتا ہوں۔
آج کی تقریب کا مقصد ان شہدا کی قربانیوں کو یاد رکھنا ہے۔ انہوں نے کہا کہ قوم اور عسکری ادارے وزیراعظم محمد نواز شریف کے ساتھ کھڑے ہیں۔ دہشت گردوں کے خلاف ہماری جدوجہد جاری رہے گی۔ شہدا کے لواحقین کو سہولیات دینے کی کوشش کررہے ہیں۔ کوشش ہے کہ دہشت گردی کے خلاف جنگ کو جلد منطقی انجام تک پہنچائیں۔

موضوعات:جنرل قمر جاوید باجوہ