کراچی (این این آئی)سندھ ہائی کورٹ نے رکن سندھ اسمبلی شرمیلا فاروقی کو نااہل قرار دینے کی درخواست کی سماعت 8دسمبر تک ملتوی کر دی ہے۔ عدالت نے الیکشن کمیشن اور دیگر کو جواب الجواب جمع کرانے کا حکم دے دیا۔سندھ ہائی کورٹ میں رکن سندھ اسمبلی شرمیلا فاروقی کو نااہل قرار دینے کی درخواست کی سماعت ہوئی۔ عدالت نے شرمیلا فاروقی کے خلاف نیب
اور الیکشن کمیشن کو کارروائی سے روکنے سے متعلق حکم امتناع برقرار رکھا اور الیکشن کمیشن اور دیگر کو جواب الجواب جمع کرانے کا حکم دے دیا۔ڈپٹی اٹارنی جنرل نے جواب جمع کرانے لیے مہلت مانگ لی۔ عدالت نے احکامات کے باوجود جواب جمع نا کرانے پر ڈپٹی اٹارنی جنرل کی سرزنش کی اور حکم دیا کہ تمام فریقین آئندہ سماعت پر دلائل کیلئے تیاری کر کے آئیں۔نیب کے جمع کرائے گئے جواب میں کہا گیا ہے کہ شرمیلا فاروقی سزایافتہ ہیں، کوئی سرکاری عہدہ نہیں رکھ سکتیں۔ نیب قانون کے مطابق کارروائی کر رہا ہے۔
نیب نے شرمیلا فاروقی کو نااہل قرار دینے کیلئے سٹیٹ بنک اور الیکشن کمیشن کو دو خط لکھے ہیں۔شرمیلا فاروقی کے وکیل نے موقف اختیار کیا کہ شرمیلا فاروقی کی سزا دو ہزار ایک میں پلی بارگین کی ذریعے ختم ہو گئی تھی۔ پلی بارگین کے بعد نااہلی کی سزا قائم رہنے کا قانون دو ہزار کے بعد بنا سزا اس سے پہلے ہوئی۔
