ملتان (این این آئی) ملتان کے نجی سکول میں پولیس کی مشقوں نے لوگوں کو خو ف میں مبتلا کر دیا مائیں روتی ہوئی اپنے بچوں کو لینے پہنچ گئیں۔میڈیا رپورٹس کے مطابق ملتان میں بوسن روڈ پر ایک نجی سکول کے باہر اس وقت افراتفری اور کہرام کی فضائپیدا ہو ئی جب لوگوں نے سکول کے احاطے میں انسداد دہشتگردی پولیس کی بھاری نفری ، فائر بریگیڈ اور ریسکیو کی گاڑیوں کو مشقیں کرتے ہوئے دیکھالوگوں نے سمجھا کہ سکول پر دہشت گردوں نے حملہ کر دیا ہے اور خبر علاقے میں جنگل میں آگ کی طرح پھیل گئی اور مائیں اپنے بچوں کی خیریت دریافت کرنے ننگے پاؤں سکول کے باہر پہنچ گئیں، ماں کی ممتا دیکھ کر سکولز میں موجود ہر فرد کی آنکھیں اشکبار ہو گئیں۔ذرائع کا کہنا ہے کہ انسداد دہشتگردی پولیس اور حساس اداروں نے سکول انتظامیہ کی اجازت سے دہشت گردی سے نمٹنے کیلئے ایک روزہ مشقوں کا آغاز کیا تاہم سکول انتظامیہ نے ان مشقوں کے بارے میں نہ تو بچوں کو ہی آگاہ کیا اور نہ ہی والدین کو بتایا گیا جس کے باعث اس قسم کی صورت حال کا سامنا کرنا پڑا۔

موضوعات:دہشتگردی مشقیں