اسلام آباد (مانیٹرنگ ڈیسک) پاکستان تحریک انصاف کی مرکزی پولیٹیکل کمیٹی کے رکن ولید اقبال نے کہا ہے کہ حمز ہ شہبا ز اچھی طرح کان کھول کر سن لیں کہ عمران خان کا ٹارگٹ صر ف ایک ہی ہے اور وہے ملک سے کرپشن کا خاتمہ اور کرپٹ افراد کا احتساب ، (ن)لیگ کے قائدین اور درباریوں کی راولپنڈی میں تحریک احتساب ریلی میں لاکھوں عوام کی شرکت دیکھ کر ہوش اڑ گئے ہیں اور وہ بوکھلاہٹ کا شکا ر ہوکر الٹے سیدھے بیانات دے رہے ہیں مگر عوام ان بہروپیوں کو اچھی طرح پہچان چکے ہیں وہ ان کی کسی چال میں نہیں آئیں گے۔ 14اگست کے حوالے سے اپنے پیغام میں ولید اقبال نے کہاکہ اگر ملک کو قائداعظم اور علامہ اقبا ل کی سوچ اور فلسفے کے مطابق چلایا جاتا تو آج پاکستان ان مشکلات کا شکار ناہوتا، انتہائی افسوس کی بات ہے کہ آج سے 69 سال پہلے پاکستان لاکھوں قربانیاں دے کر بنایا گیا تھا اور لوگ اپنا گھر بار اور کاروبار چھوڑ کر ایک آزاد ملک میں آئے تھے ۔
انہوں نے کہا کہ بھارت نے 14 اگست کے دن ایل او سی معاہدے کی خلاف ورزی کرتے ہوئے کھلی جارحیت کی ہے اور پاکستان کے سرحدی علاقوں پر فائرنگ کر کے ہمارے حکمرانوں کو کیا پیغام دیا ہے؟ پوری قوم کشمیروں پر بھارتی مظالم او ر آئے روز سرحدی علاقوں اور معصوم شہریوں پر بھارتی سیکورٹی فورسز کی جانب سے فائرنگ کے خلاف سراپا احتجاج ہے مگر حکمران خاموش تماشائی بنے ہوئے ہیں۔ انہوں نے کہا کہ چند مفاد پرست عناصر نے ملک کو بے دردی سے لوٹا ہے اورملکی اور عوامی مفادات کو بالائے طاق رکھ کر ذاتی مفادات کو ترجیح دی اور آج حالت یہ ہے کہ ملک تباہی کے دہانے پر پہنچ چکا ہے، تحریک انصاف ملک سے کرپشن اور کرپٹ عناصر کے خلاف احتساب کروا کے دم لے گی عوام عمران خان کے ساتھ ہیں اور تحریک احتساب میں حکمرانوں کے خلاف سڑکوں پر آکر انہوں نے ثابت کردیا ہے کہ وہ جھوٹے اور کرپٹ حکمرانوں کے خلاف ہے اور ان کا فوری احتساب چاہتے ہیں۔