لاہور (آن لائن) پاکستان عوامی تحریک نے سانحہ کوئٹہ کے پیش نظر اپنا 16اگست کا احتجاج ملتوی کرتے ہوئے20اگست کو احتجاج کرنے کا اعلان کیا ہے۔ منگل کے روز ماڈل ٹاؤن میں واقع منہاج سیکرٹریٹ میں پریس کانفرنس سے خطاب کرتے ہوئے پاکستان عوامی تحریک کے سربراہ پروفیسرڈاکٹر طاہر القادری نے کہا کہ لگتا ہے کہ ہمارا طرزعمل ہماری پالیسیوں میں کوئی ایسا خلا موجود ہے جس کی وج ہسے آئے دن اس قسم کے سانحات رونما ہورہے ہیں حادثات پروان چڑھ رہے ہیں انہوں نے کہا کہ سانحہ کوئٹہ کی وجہ سے پاکستان کا ہر دل دکھی ہے ہر شخص سوگ میں ہے اور بازوؤں پر سیاہ پٹیاں باندھ کر سانحہ کوئٹہ کے غم میں برابر کا شریک ہے اور ہر زبان پرافسوس کااظہار ہے۔
انہوں نے کہا کہ پاکستان عوامی تحریک نے فیصلہ کیا ہے کہ سانحہ کوئٹہ کے پیش نظر پاکستان عوامی تحریک اپنا16اگست کا احتجاج ملتوی کردے اور اب یہ احتجاج 20اگست کو ہوگا پروفیسر ڈاکٹر طاہرالقادری نے کہا کہ سانحہ کوئٹہ میں ایسے وکلاء بھی شہید ہوئے جو ہماری یونیورسٹی سے پڑھ کر گئے تھے بلکہ عبدالرشید نامی شہید ہمارا سرگرم رکن تھا انہوں نے کہا کہ سانحہ کے تمام شہداء اور زخمی ہمارے تھے ہمارے ہیں جن کے ورثاء کے دن میں برابر کے شریک ہیں۔ انہوں نے اعلان کیا کہ وہ سانحہ کوئٹہ کے شہداء اور زخمیوں کے ساتھ ہیں انہوں نے حکومت سے مطالبہ کیا کہ سانحہ کوئٹہ کے شہداء کے ورثاء کے دکھوں کا مداوا کیاجائے اور زخمیوں کا ملک کے اعلیٰ ہسپتالوں میں علاج کروایا جائے اورملک سے دہشت گردی کو ختم کیا جائے۔