اسلام آباد (نیوز ڈیسک) سوئی ناردرن گیس پائپ لائنز لمیٹڈ (ایس این جی پی ایل) نے اسلام آباد کے متعدد علاقوں میں گیس کی فراہمی چند گھنٹوں کے لیے بند رکھنے کا اعلان کیا ہے۔

کمپنی کی جانب سے جاری نوٹس کے مطابق کھنہ پل کے قریب سروس روڈ ایسٹ، اسلام آباد ایکسپریس وے پر مین گیس پائپ لائن سے متعلق کام کے باعث گیس سپلائی عارضی طور پر معطل کی جائے گی۔

اعلامیے کے مطابق گیس کی بندش پیر 7 ستمبر کی رات 9 بجے شروع ہوگی جو منگل 8 ستمبر کی صبح 5 بجے تک جاری رہے گی۔

اس دوران غوری ٹاؤن سے فیض آباد ایسٹ سروس روڈ، لہتراڑ روڈ کے کھنہ پل سے برما ٹاؤن تک کے علاقے، سوہان، غوری ٹاؤن، گلبرگ، شکریال، رحمان گارڈن اور ان سے ملحقہ علاقوں میں گیس دستیاب نہیں ہوگی۔

ایس این جی پی ایل نے متاثرہ علاقوں کے رہائشیوں کو ہدایت کی ہے کہ وہ گیس کی بندش کے دوران ضروری متبادل انتظامات پہلے سے مکمل کرلیں۔

حکام نے مزید کہا ہے کہ کسی بھی ممکنہ حادثے سے محفوظ رہنے کے لیے گیس کی فراہمی بحال ہونے تک تمام گیس استعمال کرنے والے آلات بند رکھے جائیں اور احتیاطی تدابیر پر عمل کیا جائے۔