ساہیوال(این این آئی)نواحی چک 134/9ایل کے قریب لاہور کی بیوٹی پارلر کی مالکہ مس انعم پر 2 نقاب پوش موٹر سائیکل سوار ملزمان نے تیزاب پھینک دیا جس کے نتیجہ میں وہ بری طرح جھلس گئی جسے فوری طور پر سول اسپتال میں منتقل کر دیا گیا ۔متاثرہ خاتون نے فہد لودھی پر الزام لگایا ہے کہ اس نے مجھ سے شادی کے انکار پر اپنے ساتھی کیساتھ ملکر تیزاب ڈالا ہے۔ تفصیلات کیمطابق چک 134/9ایل کے محمد الیاس خاں کی بیٹی مس انعم نے لاہور میں بیوٹی پارلر کھول رکھا ہے اور شب برات کی چھٹیوں میں وہ اپنے گھر آئی ہوئی تھی، آج وہ اپنے کزن سلیمان خاں کے ہمراہ موٹر سائیکل پر سوار ہو کر لاہور واپس جانے کیلئے ڈائیو بس سٹاپ پر جا رہے تھے کہ اچانک ایک موٹر سائیکل پر سوار 2نقاب پوشوں نے خاتون کے قریب ا آکر تیزاب پھینک دیا اور فرار ہو گئے ،خاتون کا 50فیصد جسم کا حصہ متاثر ہوا ہے جبکہ اسپتال ذرائع خاتون کی حالت خطرے سے باہر بتائی جا رہی ہے ۔پولیس نے موقعہ پر پہنچ کر کاروائی شروع کر دی ہے تاہم ابھی تک کوئی ملزم گرفتار نہیں ہو سکا۔