لاہور (آن لائن) اسپیکر قومی اسمبلی سردار ایاز صاد ق نے کہا ہے کہ ٹرم آف ریفرنس(ٹی او آرز) پاناما جیسی کمپنیوں، قرضے معاف کرانے اور کرپشن سے متعلق بنیں گے، پاناما لیکس کے معاملے پر پارلیمانی کمیٹی کیلئے متحدہ اپوزیشن کے قومی اسمبلی کے نام میرے پاس آگئے ہیں جبکہ اپوزیشن کے سینیٹ اور حکومت کے نام پیر کو میرے پاس آجائیں گے،مجھے اس بات کا کوئی علم نہیں ہے کے وزیر اعظم نواز شریف لند ن میں سابق صدر آصف زرداری سے ملاقات کر رہے ہیں یا نہیں۔ان خیالات کا اظہار انہوں نے سابق وزیر اعظم یوسف رضا گیلانی کے گھر کے باہر میڈیا سے گفتگو کے دوران کیا۔ا سپیکر قومی اسمبلی سردار ایاز صاد ق کا کہنا تھا کہ یوسف رضا گیلانی قابل احترام سیاستدان ہیں انہیں بیٹے کی بازیابی پر مبارکباد پیش کرنے آیا ہوں جبکہ ٹی او آرز پر پیش رفت سے متعلق بھی یوسف رضا گیلانی کو آگاہ کیا ہے۔ انہوں نے کہا کہ ٹی او آر کمیٹی میں کوئی نظر انداز نہیں ہوگا، پارلیمانی کمیٹی کیلئے ملک کی چوتھی بڑی پارٹی کو نظر انداز کیا گیا لیکن بعد میں اپوزیشن نے خود ہی اسے اپنی طرف سے شامل کرلیا،اپوزیشن کے قومی اسمبلی کے نام آگئے ہیں مگر حکومت کے نام کل میرے پاس آجائیں گے جبکہ اپوزیشن کے نام بھی پیر کو آئیں گے جس کے بعد باقاعدہ مشاورت کے بعد منگل یا بدھ تک کمیٹی قائم کردی جائے گی۔اسپیکر قومی اسمبلی نے کہا کہ پارلیمانی کمیٹی کے معاملے پر ہر اپوزیشن جماعت حکومتی جماعت سے رابطے میں ہے جو کہ جمہوریت کا حسن ہے۔ ٹی او آرز تمام سیاسی جماعتوں کی خواہش کے مطابق درست سمت میں جارہے ہیں اور ٹی او آرز میں اپوزیشن کی جانب سے وزیر اعظم کے استعفیٰ کا کوئی مطالبہ نہیں کیا گیا۔وزیر اعظم نواز شریف کے دورہ لندن کے حوالے سے سردار ایاز صادق کا کہنا تھا کہ وزیر اعظم اپنے میڈیکل چیک اپ کیلئے لندن گئے ہیں اور مجھے اس بات کا علم نہیں ہے کہ ان کی سابق صدر آصف زرداری سے ملاقات ہوگی یا نہیں۔