کراچی (آئی این پی) چینی بحریہ کے سربراہ ایڈمرل وو شینگلی کو ان کی گرانقدر خدمات اور پاکستان اور چین کے درمیان دو طرفہ تعلقات بالخصوص دونوں ممالک کی بحری افواج کے مابین تعلقات کو مستحکم کرنے میں ان کے نمایاں کردار کے اعتراف میں جمعرات کوپاکستان کے اعلی ترین فوجی اعزاز نشان امتیاز (ملٹری) سے سرفراز کیاگیا۔ اس سلسلے کی ایک پروقار تقریب جمعرات کو یہاں پاکستان نیوی ڈاکیارڈ میں منعقد ہوئی جہاں ریاستی و سرحدی امور کے وفاقی وزیر جناب عبدالقادر بلوچ نے مہمان کو اعزاز تفویض کیا۔ پا ک بحریہ کے سربراہ ایڈمرل محمد ذکا ء اللہ بھی اس موقع پر موجود تھے۔ تقریب میں پاکستان میں چین کے سفیر، ائیر آفیسر کمانڈنگ ساؤتھ اور پاکستان کی بری، بحری اور فضائی افواج کے دیگر سینئر افسران نے بھی شرکت کی۔ ایڈمرل وو شینگلی چیف آف نیول اسٹاف کی دعوت پر پاکستان کا دو روزہ سرکاری دورہ کررہے ہیں۔ قبل ازیں معزز مہمان نے بابائے قوم کے مزار پر حاضری دی اور پھولوں کی چادر چڑھائی۔ اپنی آج کی مصروفیات کے دوران سربراہ چینی بحریہ نے پاک بحریہ کے مختلف یونٹس کے دورے کے علاوہ کراچی میں تعینات نیول فیلڈ کمانڈز سے ملاقاتیں بھی کیں۔