کراچی(نیوزڈیسک)سیکرٹری خزانہ بلوچستان مشتاق رئیسانی کیس میں گرفتار ہونے والے ٹھیکیدار سہیل مجیدشاہ کو احتساب عدالت نے 14روزہ ریمانڈ پر نیب کے حوالے کردیا ہے۔ قومی احتساب بیورو نے دو روز قبل کراچی سے گرفتار کئے گئے مشتاق رئیسانی کے سہولت کار ٹھیکیدار سہیل مجید شاہ کو بدھ کے روزاحتساب عدالت کے جج عبدالمجید ناصر کے سامنے پیش کیا۔ احتساب عدالت نے ملزم کو 14 روز کے ریمانڈ پر نیب کے حوالے کر دیا ۔ اس موقع پر ملزم کے استدعا کرنے پر عدالت نے اسے والدہ اور اہلیہ سے ملاقات کی اجازت دے دی ۔ پراسیکیوٹر نیب ضمیر چھلگری نے نیب آرڈیننس کا حوالہ دیتے ہوئے عدالت کو بتایا کہ قانون خونی رشتوں کو ملزم سے ملنے کی اجازت دیتا ہے ۔ نیب نے عدالت میں سہیل مجیدشاہ کی میڈیکل رپورٹ بھی پیش کی ۔ رپورٹ کے تحت دوران تحویل سہیل مجیدشاہ پر کسی قسم کا جسمانی تشدد نہیں ہوا ۔ سہیل مجیدشاہ نے مشتاق رئیسانی کے گھر سے ملنے والے خزانے میں سے 26 کروڑ روپے کی ملکیت کا اقرار کیا ہے اور ساتھ ہی ملزم نے میگا کرپشن کیس میں سیاسی رہنماؤں کے پارٹنر شپ کا بھی اعتراف کیا ، دوسری جانب نیب بلوچستان مشتاق رئیسانی کے کیس میں مطلوب ملزم سلیم شاہ کے گرفتاری کے لیے بھی کراچی میں چھاپے مار رہی ہے ۔