کراچی(این این آئی)آئی جی سندھ پولیس اے ڈی خواجہ نے اسٹینڈنگ کمیٹی کے سامنے پولیس میں سیاسی بھرتیوں اور بے ضابطگیوں کا اعتراف کر تے ہوئے کہاہے کہ جعلی بھرتیاں کرنے والے افسران کے خلاف نیب تحقیقات کر رہی ہے، پولیس کے اخراجات سیاستدانوں کی وجہ سے بڑھتے ہیں۔بدھ کو سندھ اسمبلی کی قائمہ کمیٹی برائے داخلہ کا اجلاس چیئرمین سید اویس شاہ کی صدارت سندھ اسمبلی بلڈنگ کے کمیٹی روم نمبر1میں ہوا۔ اجلاس میں آئی جی سندھ، سیکرٹری داخلہ سمیت دیگر اعلی پولیس حکام نے شرکت کی۔ اجلاس کو بریفنگ دیتے ہوئے آئی جی سندھ اے ڈی خواجہ نے پولیس میں 1800 جعلی بھرتیوں کا عتراف کرتے ہوئے کہا کہ معاملے کی تحقیقات جاری ہیں۔انہوں نے کہا کہ ہیلی کاپٹر یا جہاز کے لئے فیول کی خریداری کی خبر درست نہیں، تاہم گاڑیوں کے لئے فیول کی خرید و فروخت میں دھاندلی ضرور ہوئی ہے۔ سکیورٹی زون کی زیادہ گاڑیاں سیاستدانوں کے ساتھ ہیں، سیاستدانوں کے ساتھ سفر کی وجہ سے فیول زیادہ لگتا ہے۔آئی جی سندھ نے اسٹینڈنگ کمیٹی سے درخواست کی کہ سندھ پولیس کے بجٹ میں اضافہ کیا جائے۔ اسٹینڈنگ کمیٹی کے چیئرمین سید اویس شاہ نے ڈی آئی جی سکھر کو عدم حاضری پر شو کاز نوٹس جاری کر دیا۔