اسلام آباد(این این آئی) اپوزیشن جماعتوں نے پاناما لیکس کے معاملے پر قومی اسمبلی میں وزیراعظم سے وضاحت کے لئے سوالنامہ تیار کرنے کا فیصلہ کیا ہے۔ منگل کو حکومت کی جانب سے وزیراعظم کے ایوان میں جمعہ کو آنے کے اعلان کے بعد اپوزیشن جماعتوں نے پاناما لیکس پر ان سے وضاحت کے لئے سوال نامہ تیار کرنے کا فیصلہ کیا ہے ۔ اپوزیشن جماعتوں نے بتایا کہ وزیراعظم ایوان کو جواب دہ ہیں اس لئے پاناما لیکس کے معاملے پر صرف ایوان میں حاضری کافی نہیں بلکہ انہیں اپوزیشن جماعتوں کو مطمئن کرنا ہوگا۔تحریک انصاف کے رہنما جہانگیر ترین نے پارلیمنٹ ہاؤس میں صحافیوں سے غیررسمی گفتگو کرتے ہوئے بتایا کہ اپوزیشن جماعتوں نے فیصلہ کیا ہے کہ وزیراعظم کی ایوان میں حاضری سے ہی مطمئن نہیں ہوں گے بلکہ اپوزیشن جماعتوں نے پاناما لیکس کے معاملے پر وزیراعظم سے سوالات کی صورت میں وضاحت مانگنے کا فیصلہ کیا ہے اور مشاورت سے (آج) بدھ تک سوالنامہ تیارکرلیا جائے گا۔ انہوں نے کہاکہ سوالنامے میں وزیراعظم سے پوچھا جائے گا ان کے خاندان کی جانب سے پاناما منتقل کی گئی رقم پر کتنا ٹیکس ادا کیا گیا اور پاناما میں کتنی سرمایہ کاری کی، پیسہ کہاں سے آیا اور کیسے بھجوایا گیا۔ذرائع کے مطابق اپوزیشن لیڈر خورشید شاہ (آج) بدھ کو اسلام آباد میں موجود نہیں ہوں گے اس لئے تحریک انصاف کے سینئر رہنما شاہ محمود قریشی ایوان میں یہ سوالنامہ پیش کریں گے۔