پشاور(این این آئی)خیبر پختونخوا حکومت میں ہلچل،بڑے پیمانے پر ’’تبدیلی آگئی‘‘،حکومت خیبر پختونخوا نے کئی افسران کی تقرریوں اور تبادلوں کے احکامات جاری کئے ہیں۔جاری کردہ اعلامیہ کے مطابق سیکرٹری محکمہ اعلیٰ تعلیم مسماۃ فرح حامد خان(بی ایس۔20)کوتبدیل کر کے بحیثیت سیکرٹری محکمہ صنعت و تجارت تعینات کیا گیا ہے۔ اسٹبلشمنٹ ڈیپارٹمنٹ میں اپنی تقرری کے منتظر محمد سلیم(بی ایس۔20)کو اول الذکر کی جگہ سیکرٹری محکمہ اعلیٰ تعلیم مقرر کیا گیا ہے اور سیکرٹری محکمہ صنعت و تجارت ڈاکٹر آفتاب اکبر درانی (بی ایس۔20)کوتبدیل کرکے ڈیپوٹیشن کی بنیاد پر للسائل والمحروم فاؤنڈیشن کے مینجنگ ڈائریکٹرکی حیثیت سے انکی تعیناتی کی گئی ہے جبکہ اسٹبلشمنٹ ڈیپارٹمنٹ میں اپنی تعیناتی کے منتظر محمد طاہر حسن(بی ایس۔19انفارمیشن گروپ)کو اپنی تنخواہ اور سکیل میں بحیثیت سیکرٹری محکمہ اطلاعات وتعلقات عامہ تعینات کر کے سیکرٹری محکمہ صحت محمد عابد مجید کو اضافی ذمہ داریوں سے فارغ کر دیا گیا ہے اس کے علاوہ سیکرٹری محکمہ معدنی ترقی ڈاکٹرسید عطاء الرحمن(بی ایس۔20)اورللسائل والمحروم فاؤنڈیشن کے مینجنگ ڈائریکٹر احمد حسن خان(بی ایس۔20)کے تبادلے کرکے دونوں کواسٹبلشمنٹ ڈیپارٹمنٹ رپورٹ کرنے کی ہدایات کی گئی ہیں جبکہ سیکرٹری اے آئی سی فاٹا سید ظہیر الاسلام(بی ایس۔19) کو تبدیل کرکے سیکرٹری محکمہ معدنی ترقی اپنی تنخواہ اور سکیل پرتعینات کیا گیا ہے۔ مزید برآں مذکورہ بالاتبادلوں کے نتیجے میں سیکرٹری محکمہ اعلیٰ تعلیم محمد سلیم (بی ایس۔20) کوسیکرٹری سائنس اینڈٹیکنالوجی و انفارمیشن ٹیکنالوجی ڈیپارٹمنٹ کی اضافی ذمہ داریاں بھی تفویض کرکے سیکرٹری پی اینڈڈی ڈیپارٹمنٹ سید ظفرعلی شاہ (بی ایس۔20)کو اضافی چارج سے فارغ کر دیا گیا ہے۔ اس امرکا اعلان اسٹبلشمنٹ ڈیپارٹمنٹ کے جاری کردہ ایک اعلامیے میں کیا گیا۔