لاہور ( این این آئی) پاکستان پیپلز پارٹی کو شہباز تاثیر اور علی حید ر گیلانی کی بحفاظت بازیابی کی صورت میں دو ماہ میں دو بڑی خوشخبریاں ملیں ۔مقتول گورنر پنجاب سلمان تاثیر کے بیٹے شہباز تاثیر کو 26اگست 2011ء کو لاہور میں اپنے گھر سے دفتر جاتے ہوئے اغوا ء کر لیا گیا تھا اور انہیں تقریباًساڑھے چار سال بعد 8مارچ 2016ء کو بلوچستان کے علاقے کچلاک سے بازیاب کروایا گیا ۔ سابق وزیر اعظم یوسف رضا گیلانی کے صاحبزادے علی حیدر گیلانی کو عام انتخابات سے دو دن قبل 9مئی 2013ء کو انتخابی مہم کے دوران ملتان کے علاقے خرم ٹاؤن سے اغواء کیا گیا تھا اور گزشتہ روز تقریباًتین سال کے طویل عرصے کے بعد انہیں افغانستان سے بازیاب کروایا گیا ہے ۔ علی حیدر گیلانی کی بازیابی شہباز تاثیر کی بازیابی کے 63دن بعد ممکن ہوئی جسے پیپلز پارٹی کے رہنما اور کارکن بڑی خوشی قرار دے رہے ہیں۔