اسلام آباد(نیوزڈیسک) کشمیرہاؤس اسلام آباد میں کشمیرکونسل کے انتخابات کیلئے ٹکٹوں کے امیدواروں سے انٹرویوکے دوران پیپلزپارٹی آزادکشمیرکی سیاسی امور کی انچارج فریال تالپوراورمشیرحکومت راجہ مبشراعجاز کے درمیان تلخ کلامی ہوئی ہے،مبشراعجاز کے صفائی دینے اورکارکنوں کے بیچ بچاؤ کے باعث معاملہ رفع دفع ہوگیا۔ذرائع نے بتایا کہ انٹرویو کے لئے بنائے گئے پینل کی سرپرست فریال تالپوردوسرے اراکین کے ساتھ انٹرویوز کی میز سے اٹھ کر کمرے میں گئیں تو امیدواروں نے ان پرہلہ بول دیااورپینل پرواضع کیا کہ اگر امجدجلیل ،چوہدری ادریس اور یونس میر میں سے کسی کوٹکٹ دیاگیا تو وہ احتجاج کریں کیونکہ ان تینوں پر بھاری رقم کے عوض ٹکٹ خریدنے کے الزامات ہیں۔اس دوران فریال تالپورتلخ لہجے میں مبشراعجاز سے مخاطب ہوئیں اورکہا کہ آپ نے بلاول بھٹوزرداری سے ان کیخلاف باتیں کیں اور پھر ان باتوں کو اخبارات میں بھی دیا۔ مبشراعجاز نے بھی اسی لہجے میں فریال تالپور کو جواب دیا کہ جو میں نے محسوس کیا وہی کہا ، پارٹی کا نظریاتی اورپرانا کارکن ہونے کے ناطے میرافرض ہے کہ میں پارٹی میں ہونے والی خرابیوں کی نشاندہی کروں تاہم میں نے اخبار میں رپورٹ نہیں کرایا۔اس سلسلے میں اخبار والوں سے پوچھاجائے کہ انہیں اس محفل میں موجود کس کارکن نے بتایا۔ مبشراعجاز کی وضاحت اورکارکنوں کے بچ بچاؤ کے سبب فی الوقت معاملہ ٹھنڈا ہوگیا۔ واضح رہے کہ مبشر اعجاز کشمیر کونسل کے لیے پارٹی ٹکٹ کے بھی خواہش مند ہیں تاہم پارٹی کی مرکزی قیادت نے 38امیدواروں میں سے صر ف تین امیدواروں کو شارٹ لسٹ کر رکھا ہے جسکا حتمی اعلان آئندہ دنوں کر دیا جائے گا ۔