لاہور(نیوز ڈیسک )پاکستان عوامی تحریک کے سربراہ ڈاکٹر محمد طاہر القادری نے کہا ہے کہ حکمران خاندان نے اپنی کرپشن چھپانے کیلئے قومی خزانے سے اشتہار چھپوا کر ایک اور معاشی دہشتگردی کی ہے، حکمرانوں کا ہر جھوٹ اگلے ہی قدم پر پکڑا جاتا ہے، پھر بھی وہ قدم قدم پر جھوٹ بولنے سے باز نہیں آرہے،ملک میں احتساب کا کوئی موثر قانونی میکانزم ہوتا تو وزیراعظم کٹہرے میں کھڑے ہوتے، کمیشن بنانا دور کی بات تاحال وزیراعظم نے اس پارلیمنٹ کو بھی جواب نہیں دیا جس پارلیمنٹ نے انہیں منتخب کیا،خاندانی بادشاہت خود کو کسی کے سامنے جوابدہ نہیں سمجھتی،کرپشن کی اس حکومتی دیوار کو گرانے کیلئے ایک فیصلہ کن ’’اجتماعی ‘‘ دھکے کی ضرورت ہے،آئی سی آئی جے اپنے موقف پر قائم ہے، حکمرانوں نے ایک بار پھر قوم کو گمراہ کرنے کوشش کی،احتساب نہ ہونے سے متعلق سینیٹ کی قائمہ کمیٹی نے ہمارے موقف کی تائید کی،قوم جان لے موجودہ ملکی قوانین کے تحت بڑے چوروں کا احتساب نہیں ہو سکتا۔مہنگائی کنٹرول کرنے کے دعویدار آٹا،مرغی ،دال، چینی غریب کی پہنچ سے دور کرنے کے ذمہ دار ہیں،عالمی سطح پر پٹرول کی قیمتیں کم ہونے کے باوجود غریب آدمی کو اس کا حقیقی ریلیف نہیں ملا۔ وہ گزشتہ روز پاکستان عوامی تحریک کے مرکزی میڈیا سیل کے اجلاس سے خطاب کررہے تھے۔ اجلاس میں سوشل میڈیا ٹیم کے ممبران نے بھی شرکت کی۔ اجلاس سے خطاب کرتے ہوئے انہوں نے کہا کہ آئندہ بجٹ میں 500ارب کے نئے ٹیکس لگانے کی بجائے حکمران 30سال میں لوٹی گئی قومی دولت واپس لائیں جو حکمران خاندان خود آف شور کمپنیاں بنا کر ٹیکس چوری کرتاہواسے تاجروں، صنعتکاروں اور دیگر طبقات سے ٹیکس مانگنے کا کوئی حق نہیں؟۔انہوں نے کہا کہ ملزم وزیراعظم پر اعتماد کا اظہار کرنے والی کابینہ ’’طوطوں‘‘ پر مشتمل ہے، کسی طوطے نے وزیراعظم سے یہ سوال نہیں کیا کہ آپ کے بچوں کو آف شور کمپنیاں بنانے اور بیرون ملک دولت کے پہاڑ کھڑے کرنے کی ضرورت پیش کیوں آئی؟اور یہ پیسہ پاکستان سے نکل کر خلیجی ممالک ،پانامہ سے ہوتا ہوا لندن تک کیسے پہنچا؟۔سربراہ عوامی تحریک نے کہا کہ پاکستان عوامی تحریک واحد جماعت ہے جس کے کارکن کرپشن کے خلاف اپنی نفرت کا اظہار کررہے ہیں اور ہم ہی وہ واحد جماعت ہیں جس کے کارکنوں نے موجودہ ظالم نظام اور کرپٹ حکمرانوں کے خلاف جانی ،مالی قربانیاں دیں ،قید و بند کی سختیاں جھیلیں اور آج بھی ہمارے سینکڑوں کارکن صوبہ بھر کی مختلف عدالتوں میں دہشتگردی کے جھوٹے مقدمات بھگت رہے ہیں۔انہوں نے کہا کہ تاحال 10 اضلاع میں عوامی تحریک کی ضلعی تنظیمیں حکومتی کرپشن کے خلاف احتجاجی مظاہرے کر چکی ہیں اور یہ سلسلہ جاری ہے۔انہوں نے کہا کہ ملکی تاریخ کی سب سے بڑی کرپشن اور بے ایمانی منظر عام پر آنے کے بعد بھی حکمرانوں کی ڈھٹائی میں کوئی کمی نہیں آئی ۔