صدر گوگیرہ(نیوز ڈیسک)سابق وزیر اعلیٰ پنجاب چوہدری پرویز الٰہی نے کہا ہے کہ پاناما لیکس کے حالیہ انکشافات کے بعد حکومتی ایوانوں میں صف ماتم بچھی ہوئی ہے اور ان کے پاؤں تلے سے زمین کھسک رہی ہے اب حکمرانوں کو قوم بھاگنے نہیں دے گی بلکہ ان سے کرپشن کی ایک ایک پائی وصول کر کے ملکی خزانہ میں جمع کروائی جائے گی ،موجودہ حکمران اپنی اولاد کے سہولت کار بننے کے بجائے اخلاقی طور پر اپنے عہدے سے الگ ہو جائیں ملکی معیشت تباہی کے دہانے پر پہنچا کر حکمران سب اچھا ہے کا راگ الاپ رہے ہیں ۔ان خیالات کا اظہار مسلم لیگ (ق) اوکاڑہ کے وفد سے گفتگو کرتے ہوئے کیا چوہدری پرویز الٰہی نے کہا کہ موجودہ حکمران عوام کی خون پسینے کی کمائی کو اپنے پروٹوکول پر خرچ کر رہے ہیں ملک کے ذمہ قرضوں کو کم کرنے کے بجائے دو گنا سے بھی زائد کر دیا گیا ہے بلا مقصد اور بغیر ٹینڈر کے اربوں روپوں کی مبینہ خرد برد کا سلسلہ جاری ہے ۔انہوں نے کہا کہ موجودہ حکومت کو عوام کے ساتھ کی جانے والی ایک ایک زیادتی کا حساب دینا پڑے گا ۔انہوں نے کہا کہ عوام موجودہ حکمرانوں سے سخت خائف ہیں آنے والے الیکشن میں اپنے بیلٹ کی طاقت سے اپنے ساتھ ہونے والی زیادتیوں ور نا انصافیوں کا حساب قوم خود لے گی ۔