اسلام آباد(نیوزڈیسک) پاکستان تحریک انصاف کے رہنما شاہ محمود قریشی نے کہا ہے کہ حکومت نے پاناما لیکس پر جوڈیشل کمیشن کے جو ٹرم آف ریفرنس بنائے ہیں اس کے تحت تحقیقات بے نتیجہ ہوگی۔ میڈیا سے بات کرتے ہوئے شاہ محمود قریشی نے کہاکہ حکومت نے پاناما لیکس پر جوڈیشل کمیشن کی تشکیل کے لیے جو خط لکھا ہے اس کا مطالعہ چیف جسٹس آف پاکستان نے نہیں کیا، چیف جسٹس اس خط پر غور کرنے کے بعد کوئی بھی فیصلہ کریں گے۔ کمیشن کیلئے حکومت کی جانب سے بنائے گئے ٹرم آف ریفرنس کسی صورت بھی صحیح نہیں، انہیں ہر اپوزیشن جماعت نے مسترد کردیا ہے کیونکہ ان ٹی او آرز کے تحت کمیشن سے کچھ حاصل نہیں ہوگا ٗاس لئے وہ سمجھتے ہیں کہ تمام اپوزیشن جماعتوں کو باہمی مشاورت سے نئے ٹی او آرز بنانا ہوں گے۔ انہوں نے کہا کہ عوام جلد از جلد تحقیقات چاہتے ہیں تاہم حکومت نے تحقیقات مکمل کرنے کیلئے کوئی وقت مقرر نہیں کیا۔شاہ محمود قریشی نے کہاکہ جمہوری معاشروں میں اپوزیشن جلسے کرتی ہے حکومتیں نہیں، حکومتیں اپنے اقدامات کے ذریعے عوام کو مطمئن کرتی ہیں تاہم وزیر اعظم نواز شریف کی جانب سے جلسوں کا اعلان ان کی گھبراہٹ کو ظاہر کرتا ہے۔ پارٹی اختلافات سے متعلق انہوں نے کہا کہ سیاسی لوگوں میں اختلافات معمول کا حصہ ہیں، تحریک انصاف میں کوئی تقسیم نہیں پارٹی انتخابات کے بعد ہم سب پھر مل بیٹھیں گے۔شاہ محمود قریشی نے کہاکہ حکومتیں اپوزیشن کے مقابلے میں جلسے نہیں کیا کرتیں، وزیر اعظم گھبرائے ہوئے ہیں ٗ وزیر دفاع خواجہ آصف کے بیان پر ردعمل میں پی ٹی آئی رہنماء نے کہا کہ بیان اشتعال دلوانے کا ہتھکنڈہ ہو سکتا ہے لیکن کارکن مشتعل نہیں ہونگے۔