اسلام آباد (نیوزڈیسک) پاکستان تحریک انصاف کے مرکزی رہنما شاہ محمود قریشی نے کہا ہے کہ پاناما لیکس پر جوڈیشل کمیشن کی حکومتی ٹرمز آف ریفرنس پر ہم مطمئن نہیں ہیں ٗحکومت کی جانب سے چیف جسٹس کو لکھے گئے خط کے جواب کا انتظار کررہے ہیں، پارٹی میں کسی قسم کا اختلاف نہیں ہے۔میڈیا سے گفتگو کرتے ہوئے شاہ محمود قریشی نے کہاکہ وزیر دفاع کے بیان کے جواب میں اشتعال میں نہیں آئیں گے خواجہ آصف جو چاہیں بیانات دیتے رہیں ہم مکمل طور پر پر امن رہیں گے ۔تحریک انصاف اپنی منزل نئے اور بہتر پاکستان کی طرف بڑھتی چلی جائے گی۔پاناما لیکس کے معاملے پر جوڈیشل کمیشن کے قیام کے حوالے سے ان کا کہنا تھا کہ حکومت کی جانب سے دی جانے والی ٹی او آرز مناسب نہیں اگر انہی ٹی او آرز کے تحت کمیشن بنے گا تو یہ صرف اتمام حجت کیلئے ہوگاتجویز دوں گا کہ مل بیٹھ کر ٹی او آر میں کمزوریوں کی نشاندہی کریں اور حکومتی نمائندے اپوزیشن کے ساتھ مل کر ٹی او آرز طے کریں جبکہ کمیشن کیلئے تحقیقات کا وقت بھی مقرر کیا جائے۔پارٹی میں دھڑے بندیوں کی سختی سے تردید کرتے ہوئے انہوں نے کہا کہ پارٹی میں کوئی اختلافات نہیں ہیں اور ہم مل کر پارٹی کی بہتری کیلئے کام کررہے ہیں البتہ پارٹی الیکشن کی وجہ سے ایسا ہوتا ہے اور لوگوں کو لگتا ہے کہ پارٹی میں تقسیم ہے تاہم اگر دو امیدوار آمنے سامنے ہونگے تو ایک بندہ کسی کو ووٹ دے گا اور دوسرا کسی اور امیدوار کو ووٹ دے گا۔