کراچی(نیوز ڈیسک) پیپلز پارٹی کے منحرف رہنما ذوالفقار مرزا نے کہا ہے کہ سندھ کے چور اگر پاناما لیکس کے پیچھے چھپنا چاہیں گے تو ایسا ہم نہیں ہونے دیں گے۔کراچی میں انسداد دہشت گردی کی عدالت میں میڈیا سے بات کرتے ہوئے ذوالفقار مرزا نے کہا کہ پاناما لیکس قومی معاملہ ہے اس کا براہ راست سندھ سے کوئی تعلق نہیں، سندھ میں اربوں کھربوں کی لوٹ مار ہوئی، حکمران جماعت کے سربراہ کی بہن نے محکمہ آبپاشی میں لوٹ مار کی، سندھ کے چور اگر پاناما لیکس کے پیچھے چھپنا چاہیں تو ایسا ہم نہیں ہونے دیں گے۔انہوں نے کہا کہ بلاول بھٹو نے والد اور پھوپھی کو مائنس کر کے سیاست نہیں کی تو ان کا سیاسی مستقبل بھی اچھا نہیں ہو گا۔ صوبے میں اربوں روپے کی کرپشن میں بڑے سیاستدان کی بہن کا نام بھی سامنے آرہا ہے۔پاک سرزمین پارٹی میں شمولیت کے حوالے سے ذوالفقار مرزا کا کہنا تھا کہ مصطفی کمال نے کراچی کی سیاست میں ہل چل مچا دی ہے۔ فی الحال ان کی پارٹی میں شمولیت کا کوئی ارادہ نہیں ہے۔ ذوالفقار مرزا نے کہا کہ اگر حکومت مخالف محاذ بنا تو سندھ کی عوام بہتر مستقبل کے لیے ضرور سوچیں گے اور وہ بھی ان کا ساتھ دیں گے۔ اس سے قبل انسداد دہشت گردی کی عدالت میں بدین اور کراچی میں قائم5 مقدمات سماعت ہوئی ، عدالت نے تمام مقدمات کی سماعت 21 مئی تک ملتوی کردی۔