اسلام آباد (نیوز ڈیسک)پاکستان پیپلز پارٹی کے رہنما قمرزمان کائرہ نے کہا ہے کہ پانا ما لیکس کا معاملہ اب دبنے والا نہیں اور آرمی چیف نے احتساب کے حوالے سے جو اقدام اٹھایا ہے وہ قابل تحسین ہے تاہم اس کے بعد حکومت پر دباؤ مزید بڑھے گا ۔ایک انٹرویو میں انہوں نے کہاکہ اس سے پہلے سیاسی جماعتوں میں احتساب کے نام پر انتقام لیا جاتا رہا اور لوگوں کی سیاسی وابستگیاں تبدیل کی گئی جس کی وجہ سے اداروں پر لوگوں کا اعتما د ختم ہو گیا ۔ انہوں نے کہا کہ پانا ما لیکس معاملے اور کرپشن پر پاک فوج ، پارلیمنٹ ، عدلیہ اور تمام جماعتیں کہہ رہی ہیں کہ احتساب ہو نا چاہئے مگر اس کے باوجود حکومت رکاوٹیں پیدا کر رہی ہے ۔ایک سوال پر قمر زمان کائرہ کا کہنا تھا کہ ہم نیب کو ختم کرنے کی بات نہیں کر رہے مگر جہاں ضرورت ہے وہاں قانون سازی کی جائے اور احتساب کے عمل کو موثر بنایا جائے ۔ وزیر اعظم کے خاندان کے افراد پر کرپشن اور منی لانڈنگ کے الزامات ہیں جو روز برو ز سنگین ہو رہے ہیں مگر حکومتی وزراء کرپشن کو بچانے کیلئے بیانا ت دینے میں مصرو ف ہیں ۔ پانا ما لیکس تحققیاتی کمیشن کے حوالے سے ان کا کہنا تھا کہ جن لوگوں کو شفاف تحقیقات سے حقائق سامنے آنے کا خوف ہے وہ تحقیقات کے راستے میں رکاوٹ بنے ہوئے ہیں ۔