راجن پور (نیوز ڈیسک )راجن پور میں چھوٹوگینگ کے خلاف آپریشن22ویں روز بھی جاری پاک فوج نے پیش قدمی کرتے ہوئے کچے کے تمام داخلی و خارجی راستوں کو سیل کردیا دوپہر ایک سے دو اور شام پانچ سے چھ بجے کے درمیان کرفیو میں نرمی دریا میں کشتی چلانے پر بھی پابندی عائد ۔ تفصیلات کے مطابق راجن پور کے کچے کے علاقے میں پاک فوج کے اہلکار چھوٹو گینگ کے خلاف پیش قدمی جاری رکھے ہوئے ہیں اور انہیں پولیس اور رینجرز کا مکمل تعاون حاصل ہے۔ علاقے میں صبح 7بجے سے 9 بجے تک کرفیو میں نرمی کی گئی تھی جس کے بعد ایک مرتبہ پھر کرفیو نافذ کردیا گیا ہے جبکہ دوپہر ایک سے 2 اور شام 5 سے 6 بجے کے درمیان بھی کرفیو میں نرمی کا اعلان کیا گیا ہے۔ کرفیو میں نرمی کے دوران مقامی افراد اپنے کھیتوں کا کام کرتے ہیں اور پھر دوبارہ اپنے اپنے ٹھکانوں پر چلے جاتے ہیں۔پاک فوج کے کچے کے تمام داخلی اور خارجی راستوں کو مکمل طور پر سیل اور دریا میں کشتی چلانے پربھی پابندی لگادی گئی ہے جب کہ ڈرون اور ہیلی کاپٹروں کی مدد سے چھوٹو گینگ کی نگرانی کی جارہی ہے۔ کسی بھی ناخوشگوار واقعے کی صورت میں رحیم یارخان ، راجن پور اور ڈیرہ غازی خان کے تمام سرکاری اسپتالوں میں ایمرجنسی نافذ کردی گئی ہے۔ دوسری جانب پاک فوج کی جانب سے راجن پور کے علاقوں جمال دین والی ، بھونگ اور راجن پور سے گدو بیراج تک 20 پولیس چوکیاں قائم کر دی گئی ہیں جبکہ قریبی بستیوں کو بھی خالی کرالیا گیا ہے ۔ رحیم یار خان کے شیخ زید ہسپتال اور صادق آباد کے تحصیل ہیڈ کوارٹرز ہسپتال میں ایمرجنسی نافذ کرکے ڈاکٹروں کی چھٹیاں منسوخ کر دی گئی ہیں ۔ شیخ زید ہسپتال کے دو وارڈ بھی خالی کرا لئے گئے ہیں ۔ دوسری جانب چھوٹو گینگ کے نو سہولت کاروں کی نشاندہی بھی ہوئی ہے جن میں سے متعدد کا تعلق سیاسی جماعتوں سے ہے ۔ واضح رہے کہ گزشتہ ماہ پولیس نے چھوٹو گینگ کے خلاف آپریشن شروع کیا تھا تاہم 7 پولیس اہلکاروں کی ہلاکت اور کئی کے یر غمال بنائے جانے کے بعد اس کارروائی میں پاک فوج کو شامل کیا گیا۔