فیصل آباد (نیوز ڈیسک) وزیر مملکت پانی و بجلی عابد شیر علی نے کہا ہے کہ ملک میں ہونے والی ترقیاتی کام اور چین کی مدد سے اقتصادی راہداری کو ناکام کرنے کے لئے غیر ملکی طاقتیں پاکستان کی حکومت کو کمزور کرنا چاہتی ہیں اور اب ایک منصوبے کے تحت پانامہ لیکس کے ذریعے وزیر اعظم پر الزامات لگانے کی سازش کی جا رہی ہے حکومت پر پانامہ لیکس کا کوئی دباﺅ نہیں ہے آئندہ چند روز میں دودھ کا دودھ اور پانی کا پانی ہو جائے گا وزیر مملکت عابد شیر علی نے آن لائن کو ایک خصوصی ملاقات میں بتائی ۔ انہوں نے کہا کہ آپریشن ضرب عضب پورے ملک میں چل رہا ہے ۔ جس کے مثبت نتائج برآمد ہوئے ہیں ۔ کراچی اور دیگر شہروں میں بھتہ خوری اور اغواءبرائے تاوان اور دیگر سنگین جرائم کی وارداتوں میں کافی حد کمی ہوئی ہے ۔ وزیر مملکت نے ایک سوال کے جواب میں بتایا کہ کچے کے علاقہ میں جرائم پیشہ افراد کے پاس جدید ترین ہتھیار ہیں اور چھوٹوں گینگ اور اس کے کارندوں کو بلوچستان کی علیحدگی پسند تنظیموں کے ساتھ ساتھ ملک دشمن طاقتوں کی بھی سپورٹ حاصل ہے مگر پاکستان کی مسلح افواج اور دیگر سیکورٹی اداروں نے کچے کے علاقہ میں جو آپریشن شروع کیا ہے اس سے نہ صرف چھوٹو گینگ کا خاتمہ ہو گا بلکہ ان کے سہولت کاروں کے خلاف بھی گھیرا تنگ کیا جائے گا ۔عابد شیر علی نے مزید بتایا کہ عمران خان اور سیاسی راہنما ایک سوچے سمجھے منصوبے کے تحت ملک میں بدامنی پھیلانے کی کوشش کر رہے ہیں مسلم لیگ نون کے کارکن بھی بہت جذباتی ہیں مگر ہم خون ریزی نہیں کرنا چاہتے اور نہ ہی ہم سخت زبان اور سخت رویہ اختیار کریں گے انہوں نے کہاکہ وزیر اعظم نواز شریف نے پارٹی کے وزراءاور دیگر رہنماﺅں کو ہدایت کر رکھی ہے کہ وہ کسی قسم کی غلط زبان یا ایسے بیان بازی نہ کریں جس سے اشتعال پھیلے انہوں نے کہا کہ 2018 کے انتخابات میں بھی بھاری اکثریت سے جیتے گی بلکہ لوڈشیڈنگ کے خاتمے کے ساتھ ساتھ ملک بھر کے لاکھوں افراد کو روزگار کے مواقع فراہم ہوں گے ۔