سکھر(نیوز ڈیسک) قومی اسمبلی میں قائد حزب اختلاف سید خورشید شاہ کا پنجاب میں دہشتگردوں کے خلاف آپریشن کے آغاز کو خوش آئند قرار دیتے ہوئے کہنا تھا کہ وہ ایک مدت سے کہتے آرہے ہیں کہ پنجاب میں بھی دہشتگردی کی نرسریاں موجودہیں اوران کے خلاف فوراً آپریشن ہونا چاہئے لیکن میری بات پر توجہ نہیں دی گئی اور اس غفلت کا نتیجہ یہ ہے کہ ہم ابھی تک دہشتگردی کے ناسور سے چھٹکارا حاصل نہیں کر سکے،پنجاب میں فورسز کی طرف شروع ہونے والے آپریشن کا آغاز اس بات کا ثبوت ہے کہ یہاں دہشتگردی کا نیٹ ورک موجود ہے،دہشتگردی کو جڑ سے اکھاڑ پھیکنے کا خواب اس وقت تک شرمندہ تعبیر نہیں ہو سکتا جب تک حکمران دائیں اور بائیں بازو کی سیاست سے باھر نکل کر نہیں سوچیں گے۔ان خیا لا ت کا اظہار انہو ں نے منگل کے روز جاری اپنے بیان میں کیا۔انکا کہنا تھاکہ ہم نے اپنے دور حکومت میں سیاسی فائدے کو بالائے طاق رکھ کر دہشتگردی کے خلاف پوری قوت سے کاروائی کی اور قوم گواہ ہے کہ دہشتگردوں نے ہمیں کچھ قوتوں کے ساتھ ملکر انتخابی مہم سے بھی دور رکھا، مگر آج میں یہ کہنے میں حق بجانب ہوں کے ہم نے قومی مفاد کو ذاتی اور پارٹی مفاد سے بالا ئے طاق رکھتے ہوئے انکے خلاف موثر اقدامات اٹھائے، مگر آج دائیں بازو کی حمایت حاصل کرنے کے لئے نہ صرف معصوم اور قیمتی جانوں کو قربان کیا جا رہا ہے بلکہ پارلیمینٹ اور اعلی عدلیہ کا تقدص بھی پامال ہو رہا ہے اور حکومت کی رٹ بھی چیلنج ہو رہی ہے۔ قائد حزب اختلاف نے کہا کہ ہم اب بھی دہشتگردی کے خلاف ہر سطح اورہر محاذ پر لڑیں گے۔ انہوں نے کہا کہ ہماری فورسز دہشتگردی کے خلاف بھرپور کامیابی حاصل کر رہی ہیں اور انشااللہ وہ پنجاب سے بھی دہشتگردی کو اکھاڑ پھینکیں گیں۔ انہوں نے کہا کہ اگر حکومت دہشتگردی کے خلاف بر وقت اقدام کرتی تو شاید اقبال ٹاون پارک لاہور کا واقعہ وقوع پزیر نہ ہوتا اور سینکڑوں گھر اجڑنے سے بچ جاتے۔ انہوں نے کہا کہ دہشتگردی کے خلاف پنجاب میں آپریشن کو عوام قابل تحسین سمجھتے ہیں اور اسکے نتائج ملک وقوم کے وسیع تر مفاد میں نکلیں گے۔ انہوں نے کہا کہ دہشتگرد پاکستان، اسلام اور ہماری سلامتی کے دشمن ہیں اور ایسے دشمنوں کا قلع وقمع کرناہم سب کی ذمہ داری ہے۔