اسلام آباد(نیوزڈیسک)بلوچستان سے گرفتار بھارتی جاسوس کل بھوشن یادو نے تفتیش کے دوران انکشاف کیا ہے کہ اس نے بلوچ علیحدگی پسندوں کو پاکستانی بندرگاہوں پر حملوں کی تربیت فراہم کی۔تفصیلات کے مطابق کل بھوشن یادو سے سفری دستاویزات اور متعدد جعلی شناختی کارڈ بھی برآمد ہوئے ¾ اسے حراست میں لے کر اسلام آباد منتقل کیا گیا جہاں اس سے تفتیش جاری ہے۔نام ظاہر نہ کرنے کی شرط پر سیکیورٹی افسر نے نجی ٹی وی کو بتایا کہ را ایجنٹ نے تفتیش کے دوران بتایا کہ اس نے کراچی اور گوادر کی بندرگاہوں پر دہشت گردی کے حملوں کی تربیت کےلئے اس نے کئی افراد کو بھارت بھیجا ¾ ایرانی پورٹ چباہار سے ایک کشتی بھی خریدی تھی۔مذکورہ جاسوس کی گرفتاری پر پاکستان نے بھارت کے ہائی کمشنر کو طلب کرکے بھارتی جاسوسوں کی بلوچستان اور کراچی میں سرگرمیوں پر سخت احتجاج بھی کیا تھا۔بھارت کے وزیر خارجہ اس بات کی تصدیق کر چکے ہیں کہ کل بھوشن یادو ہندوستانی شہری ہے اور نیوی کا سابق افسر ہے۔پاکستانی حکام کے مطابق را ایجنٹ ایران کے راستے بلوچستان میں داخل ہوا تھا اور اس کے پاس درست ایرانی ویزا بھی موجود ہے۔