لاہور(نیوزڈیسک)آل پرائیویٹ سکولز ایسوسی ایشن کے صدر کاشف مرزا نے لاہور گلشن اقبال پارک دھماکے کے بعد آج ملک بھر میں پرائیویٹ سکولز بند رکھنے کا فیصلہ کیا ہے۔تفصیلات کے مطابق لاہور کے گلشن اقبال پارک میں دھماکے میں 70سے زائد افراد جاں بحق جبکہ 300سے زائد افراد زخمی ہوئے ہیں جس پر آل پرائیویٹ سکولز ایسوسی ایشن کے صدر کاشف مرزانے افسوس کا اظہار کرتے ہوئے آج ملک بھر کے تمام پرائیویٹ سکولز بند رکھنے کا اعلان کیا ہے۔صوبائی دارالحکومت کے تمام تعلیمی اداروں کو کل بند کرنے کا اعلان کیا گیا ہے۔ جبکہ 3 روز کیلئے لاہور میں تمام سرکاری تقریبات بھی منسوخ کر دی گئی ہیں۔دوسری جانب آل پاکستان پرائیویٹ سکولز منیجمنٹ فیڈریشن نامی ایک اور تنظیم نے سکولوں میں دعائیہ تقاریب کا اعلان کیا ہے جس کے بعد والدین مزید پریشانی کاشکار ہوگئے ہیں کہ آج بچوں کو سکول بھیجیں یا نہ بھیجیں۔