اسلام آباد(نیوز ڈیسک) مسلم لیگ ن کے سینئر رہنماءاور آزاد کشمیر کے سابق وزیر کرنل (ر)راجہ نسیم اپنے سینکڑوں ساتھیوں سمیت کشمیر پی ٹی آئی میں شامل ہوگئے۔ اس موقع پر چیئرمین تحریک انصاف عمران خان نے خطاب کرتے ہوئے کہا کہ آزاد کشمیر کے عوام ظلم اور نا انصافی کے خلاف اٹھ کھڑے ہوں اور پی ٹی آئی کا ساتھ دیں۔ آزاد کشمیر کے الیکشن میں کسی کو دھاندلی نہیں کرنے دیں گے۔مسئلہ کشمیر اقوام متحدہ کی قرار دادوں کے مطابق حل کیا جائے مسئلہ کشمیر کے حل تک بھارت سے دوستی نہیں ہو سکتی۔کرنل نسیم کی پی ٹی آئی میں شمولیت سے پی ٹی آئی مضبوط ہو گی۔ان خیالات کا اظہار انھوں نے آج یہاں بنی گالہ میں کرنل (ر) کی مسلم لیگ ن سے مستعفی ہو کر پی ٹی آئی میں شمولیت کے موقع پر ایک تقریب سے خطاب کرتے ہوئے کیا۔ آزاد کشمیر کے سابق وزیر اعظم و کشمیرپی ٹی آئی کے صدر بےرسٹر سلطان محمود چوہدری نے اس موقع پر خطاب کرتے ہوئے کرنل سیم کو کشمیر پی ٹی آئی میں شمولیت پر مبارکباد دی اور انہیں پارٹی میں خوش آمدید کہا۔انھوں نے کہا کہ انکی شمولیت سے پی ٹی آئی کوآزاد کشمیر میں بالعموم اور پونچھ ڈویژن میں بالخصوص تقویت ملے گی۔ نواز شریف نے جس آدمی کو باغ میں پلانٹ کیا ہے اب ہمارا مقابلہ نواز شریف سے ہو گا اور آج کرنل نسیم کی شمولیت سے پی ٹی آئی باغ کی سیٹ جیت چکی ہے۔28 مارچ کو باغ میں عمران خان کا جلسہ ایک ٹرننگ پوانٹ ثابت ہو گا۔ جہانگیر ترین نے خطاب کرتے ہوئے کہا کہ ہم کرنل نسیم کو پی ٹی آئی میں شمولیت کو خوش آمدید کہتے ہیں ہم آزاد کشمیر کا الیکشن بھرپور طریقے سے لڑیں گے۔ اس موقع پر کرنل نسیم نے کہا کہ میں عمران خان اور بیرسٹر سلطان محمود چوہدری کی قیادت پر اپنے بھرپور اعتماد کا اظہار کرتے ہوئے اپنے ہزاروں ساتھیوں سمیت کشمیر پی ٹی آئی میں شمولیت کا اعلان کرتا ہوں۔میں عمران خان کو یقین دلاتا ہوں کہ وسطی باغ کے چودہ ہزار ووٹ پی ٹی آئی کے ساتھ ہیں۔ جبکہ نواز شریف نے باغ میں لینڈ مافیہ کے ٹولے کو عوام پر مسلط کر دیا ہے۔ ہم عمران خان کے ویژن اور تبدیلی کے نعرے کو گھر گھر پہنچائیں گے۔آئندہ حکومت پی ٹی آئی بھاری اکثریت سے جیت کر آزاد کشمیر میں حکومت بنائے گی۔ اس موقع پر کرنل (ر) راجہ نسیم کے ساتھ شمولیت اختیار کرنے والوں میں پروفیسرعبدالجلیل، راجہ شفاعت، ڈاکٹر بشیر، چئیرمین روشن، جنت عمران،سردار بشیر، اسلم سدوزئی، راجہ نور، صدیق اعوان، فاروق سدوزئی، سردار عارف، ڈاکٹر جہانگیر، چئیرمین رفیق، چئیرمین عنایت، جاوید چغتائی،منظور چغتائی، حفیظ ایڈووکیٹ اور دیگر سینکڑوں شامل تھے۔ جبکہ اس موقع پر کشمیر پی ٹی آئی کے مرکزی چیف آرگنائزر ظفر انور، کشمیر پی ٹی آئی کے مرکزی سیکریٹری اطلاعات سردار امتیاز خان، سابق وزیر صحت چوہدری رفیق نیر اور دیگر بھی موجود تھے۔